Evrópski umboðsmaðurinn krefst aukins gegnsæis

Evrópski umboðsmaðurinn, P. Nikiforos Diamandouros, hefur hvatt stjórnendur Evrópusambandsins til að auka gegnsæi í störfum sínum og koma betur fram við borgara ESB-ríkjanna. Á árinu 2009 snerust 39% kvartana, sem umboðsmanninum bárust, um skort á gegnsæi, þar á meðal að hafnað væri að láta af hendi skjöl eða upplýsingar. Önnur kvörtunarefni lutu að töfum á greiðslum fyrir ESB-verkefni, misnotkun valdheimilda og mismunun.

Meðal málanna var kvörtun vegna þess, að tveir „háttsettir“ embættismenn framkvæmdastjórnarinnar höfðu þegið VIP-miða frá framleiðanda íþróttabúnaðar á leik í París í heimsmeistarakeppninni í ruðningsbolta. Hann gagnrýndi einnig framkvæmdastjórn ESB fyrir að skrá ekki nógu vandaða frásögn af fundi með tölvuframleiðandanum Dell, þegar ásökun um samkeppnisbrot á hendur Intel var til rannsóknar.

Þegar umboðsmaðurinn kynnti ársskýrslu sína fyrir árið 2009 í Brussel í vikunni, sagðist hann ætla að leggja sig meira fram um að gæta réttinda ESB-borgara gagnvart yfirvöldum í Brussel, nú eftir að mannréttindaskrá Evrópusambandsins hefði verið lögfest.

Umboðsmanninum bárust 3.098 kvartanir á árinu 2009 frá einstaklingum, fyrirtækjum og félagasamtökum. Í næstum 80% tilvika gat umboðsmaðurinn stuðlað að lausn kvörtunarmáls með því að hefja rannsókn máls, vísa því til rétts aðila eða með því að gefa ráð um málsmeðferð. Umboðsmaður sagði, að kvörtunum, sem hann vísaði frá, hefði fækkað frá árinu 2008. Mætti rekja það til þess, að betri ráð væru nú gefin á vefsíðu embættis síns um, hvernig best væri fyrir kvartendur að haga máli sínu . Hann hefði hins vegar tekið 14% fleiri mál til meðferðar á árinu 2009 en 2008, sem sýndi, að fleiri kvartanir ættu við rök að styðjast.

Flestar kvartanir komu frá Þýskalandi, 413, þá frá Spáni, 389, Póllandi 235, Frakklandi 235. Miðað við íbúafjölda einstakra landa voru kvartendur flestir frá Lúxemborg, Möltu, Kýpur og Belgíu.