ESB-þingið vill herða vinnutíma­reglur flutningabíl­stjóra

v

Sjálfstæðir bílstjórar flutningabíla mega ekki vinna meira en 48 stundir á viku í Evópu samkvæmt samþykkt ESB-þingsins, miðvikudaginn 16. júní. Um skulu að vilja þingsins gilda sömu vinnutímareglur og þá, sem starfa hjá flutningafyrirtækjum.

Félög bílstjóra og atvinnurekenda þeirra mótmæltu samþykkt þingsins strax eftir að atkvæði féllu og töldu, að hún takmarkaði frelsi lítilla frumkvöðla til að haga störfum sínum í samræmi við þarfir viðskiptavina.

Niðurstaða þingmannanna á fundi þeirra í Strassborg gengur gegn óskum ríkisstjórna ESB-landanna og framkvæmdastjórnar ESB, sem vildu, að gerður yrði greinarmunur á hvíldarskyldu þeirra bílstjóra, sem ynnu hjá öðrum, og hinna, sem aka eigin bílum. Þeir eigi að ráða vinnutíma sínum sjálfir.

Samkvæmt núgildandi lögum ESB mega bílstjórar í þjónustu annarra vinna allt að 60 stundum á viku, enda vinni þeir ekki lengur en 48 stundir á viku að meðaltali á fjórum mánuðum.

Hart var deilt um málið á ESB-þinginu. Annars vegar voru jafnaðarmenn, kommúnistar og græningjar ásamt nokkrum íhaldsmönnum, sem vildu, að svo til sömu reglur giltu um sjálfstæða bílstjóra og hina í vinnu hjá öðrum. Með þessu yrði dregið úr hættu á félagslegri mismunun og umferðarslysum. Hins vegar mótmæltu íhaldsmenn og frjálslyndir því, að lagðar yrðu slíkar hömlur á sjálfstæða bílstjóra og eigendur lítilla fyrirtækja, sem réðu þá til starfa. Þeir töldu ógerlegt fyrir lögreglu að framfylgja lögunum.

Umræðunum lauk með því, að 368 ESB-þingmenn greiddu atkvæði með hertum reglum, 301 var á móti en átta sátu hjá. Í atkvæðagreiðslu um tillögu framkvæmdastjórnar ESB voru 383 á móti henni en 263 með.