Icesave-afstaða ESA-forseta vekur spurningu um vanhæfi

Per Sanderud, forseti ESA, sagði Íslendinga verða að borga til að losna úr snörunni

Per Sanderud

Per Sanderud, forseti Eftirlitsstofnunar EFTA, (ESA), tók svo eindregna afstöðu gegn hagsmunum Íslendinga í Icesave-málinu á fundum í tengslum við 50 ára afmæli EFTA hér á landi í síðustu viku, að spurningar hafa vaknað um hæfi ESA til að fjalla frekar um þetta mál. Samkvæmt upplýsingum Evrópuvaktarinnar undrast fróðir menn um EES-rétt og hæfisreglur, að íslensk stjórnvöld hafi ekki nú þegar krafist frávísunar málsins frá ESA

ESA sendi 26. maí áminningarbréf til Íslands vegna Icesave. Þar er komist að þeirri niðurstöðu að Ísland sé skuldbundið til að tryggja greiðslu á lágmarkstryggingu í samræmi við tilskipun um innstæðutryggingar til breskra og hollenskra sparifjáreigenda. Íslenskum yfirvöldum var veittur tveggja mánaða frestur til að svara áminningarbréfinu eða til 26. júlí.

Þegar Per Sanderud ræddi þetta mál hér á landi á fundum og í fjölmiðlum í síðustu viku, kom hvarvetna fram, að hann teldi málstað Íslands á þann veg, að ekkert fengi breytt niðurstöðu ESA. Málið er á umsagnarstigi gagnvart ESA og er beðið svara íslenskra stjórnvalda. Á það er bent af viðmælendum Evrópuvaktarinnar, að með orðum sínum hafi Sanderud rýrt svo stöðu ESA sem óhlutdrægs eftirlitsaðila í málinu, að ekki sé unnt að halda því áfram á þeim vettvangi. Beri íslenskum stjórnvöldum að krefjast frávísunar á málinu, á meðan Sanderud stjórni ESA.

Sverrir Haukur Gunnlaugsson, stjórnarmaður af hálfu Íslands í ESA, sagði sig frá meðferð Icesave-málsins hjá stofnuninni. Taldi hann sig vanhæfan vegna afskipta sinna af Icesave, á meðan hann gegndi embætti sendiherra Íslands í London. Tekur Bjarnveig Eiríksdóttir, lögfræðingur, sæti Sverris Hauks, þegar stjórn ESA fjallar um Icesave, en hún stundar lögfræðistörf hér á landi. Sverrir Haukur er búsettur í Brussel.

Til marks um eindregna afstöðu Pers Sanderuds í Icesavemálinu fara hér ummæli hans í Fréttablaðinu 25. júní:

„Það er ljóst að allt veltur á því hvort Íslendingar endurgreiði þessar

20.000 evrur á hvern innlánsreikning. Fari svo erum við reiðubúin

að láta málið niður falla,“ segir Per Sanderud, forseti ESA.

Íslensk stjórnvöld hafa frest til 26. júli að svara áliti ESA. Ef þau fallast ekki á álit stofnunarinnar verður málið sent til EFTA dómstólsins til úrskurðar, en hvaða þýðingu hefur það?

„Fari þetta fyrir dómstólinn mun hann staðfesta að Íslendingum beri að borga þessar 20.000 evrur og dómstóllinn mun fylgja því eftir“ segir Sanderud.