Össur ræðir ESB-aðildarumsókn við Króata og Ungverja

Ferðin kynnt undir formerkjum samvinnu um jarðhita

Össur Skarphéðinsson afhendir Carl Bildt, utanríkisráðherra Svía, ESB-aðildarumsókn Íslands í Stokkhólmi 23. júlí 2009.

Össur Skarphéðinsson hefur undanfarna daga unnið að því í Króatíu og Ungverjalandi að búa í haginn fyrir aðild Íslands að Evrópusambandinu, samkvæmt frétt Fréttablaðsins 12. júlí. Ráðherrann segir í samtali við blaðið, að hann hafi rætt við Ungverja í ljós þess, að þeir taka við forystu innan ESB á næsta ári, „en þá mun Ísland að öllum líkindum hefja formlegar samningaviðræður,“ segir í Fréttablaðinu.

Í samtalinu segir Össur, að heimsókn hans til Króatíu hafi „ekki síst verið til þess að kanna hvort Króatar, sem einnig eru að hefja aðildarviðræður, og Íslendingar gætu orðið samferða í umsóknarferlinu.“

Þá segir Össur:

„Samvinna og samheldni smáþjóðanna gerir það að verkum að þær standa jafnan saman og verja hagsmuni hverrar annarrar. Innan ESB eru þær því gríðarlega sterkar, og ná yfirleitt fram því sem þær þurfa nauðsynlega á að halda.“

Össur segist hafa rætt um fiskveiðimál við ráðamenn í Ungverjalandi, en landið liggur hvergi að sjó, og skipti miklu, að Ungverjar hafi góðan skilning á gildi fiskveiða fyrir Íslendinga.

Áður en Össur Skarphéðinsson lagði í ferð sína, var ekki skýrt frá því, að tilgangur hennar væri að ræða ESB-aðildarumsókn Íslendinga.

Hinn 5. júlí var send fréttatilkynning úr utanríkisráðuneytinu um, að Össur Skarphéðinsson utanríkisráðherra héldi þann dag til Króatíu og Ungverjalands í opinbera heimsókn. Hann mundi eiga viðræður við æðstu ráðamenn beggja ríkja auk þess sem hann kynnti sér verkefni sem íslensk fyrirtæki standa að í báðum löndum.

Heimsókn utanríkisráðherra hæfist í Króatíu þar sem hann hitti utanríkisráðherra landsins, Gordan Jandrokovic. Þá mundi utanríkisráðherra eiga fund með forseta landsins, dr. Ivo Josipovic, svo og öðrum ráðherrum. Utanríkisráðherra yrði einnig viðstaddur undirritun samstarfssamnings milli verkfræðistofunnar Eflu og Energy Institute Hrovje Pozar um jarðhitaverkefni í Króatíu.

Miðvikudaginn 7. júlí héldi utanríkisráðherra til Ungverjalands, þar sem hann ætti fundi með János Martonyi, utanríkisráðherra landsins og Pal Schmitt, forseta þingsins og nýkjörnum forseta. Ennfremur mundi Össur halda til borgarinnar Szentlorinc til að kynna sér jarðhitaverkefni sem íslenska verkfræðistofan Mannvit vinnur að.