Álagsprófið kann að fella 10 til 15% evrópskra banka

Hið sameiginlega evrópska álagspróf á banka er talið verða erfiðara en upphaflega var ætlað. Þýska blaðið Handelsblatt segir 12. júlí, að ef til vill muni 10 til 15% af bönkunum ekki standast prófið. Vitnar blaðið þar í heimildarmann í stjórn þýsks banka.

Stjórnarmaðurinn telur, að meira en 10 bankar í Evrópu, þar af einn eða tveir í Þýskalandi, falli á prófinu. Ætlunin er að birta niðurstöður í prófinu 23. júlí í því skyni að sanna fyrir fjárfestum, að evrópska bankakerfið sé nógu sterkt til að standa af sér skuldakreppuna á evru-svæðinu og niðurskurð ríkisútgjalda til að vinna á kreppunni.

Handelsblatt hefur eftir hinum ónafngreinda heimildarmanni sínum, að prófin verði að vera trúverðug til að skapa traust. Blaðið vitnaði einnig til ónafngreindra manna í fjármálaheiminum, sem sögðu, að prófin væru ekki „sýndarmennska“, og þar yrðu lagðar raunir fyrir bankana, sem þeir kynnu einhvern daginn að þurfa að ganga í gegnum. Talið er, að einn eða tveir af þýsku Landesbönkunum, það er bönkum í eigu einstakra landa þýska sambandslýðveldisins, kunni að heltast úr lestinni.

Bankaeftirlitsmenn í einstökum ríkjum munu efna til prófanna og verða þau lögð fyrir 91 banka. Látið verður á það reyna, hvaða áhrif það hefur á banka, ef efnahagsástandið versnar enn og þeir þurfi að afskrifa ríkisskuldabréf í eignasafni þeirra. Í hópi hinna 91 fjármálastofnana eru fulltrúar 65% af bankakerfi Evrópu. Standist banki prófið, þolir hann álagið vegna efnahagshremminganna, sem látnar eru dynja á honum. Falli banki á prófinu sýnir það, að auka þarf eigið fé hans við hinar tilbúnu aðstæður.