Utanríkis­ráðherrar ESB á fundi um viðræðuafstöðu gagnvart Íslandi

Utanríkisráðherrar ESB-ríkjanna koma saman í dag á reglulegum fundi sínum. Þar verður meðal annars tekin ákvörðun um viðræðuafstöðu ESB til Íslands, sem framkvæmdastjórn ESB hefur samið. Tillögur framkvæmdastjórnarinnar byggjast á viðhorfi embættismanna ESB. Vangaveltur eru um, hvort utanríkisráðherrarnir setji pólitísk skilyrði um Icesave, hvalveiðar og makríl, svo að nefnd séu atriði, sem fram hafa komið á ESB-vettvangi síðustu mánuði.

Leiðtogaráð ESB-ríkjanna féllst á það álit framkvæmdastjórnarinnar, að Ísland væri viðuræðu- og aðildarhæft á fundi sínum 17. júní. Hinn 7. júlí gaf ESB-þingið jákvætt álit sitt á aðildarviðræðum við Ísland, enda féllust Íslendingar á að hætta hvalveiðum. Þýskir þingmenn settu sambærilegt skilyrði, þegar þeir gáfu þýsku ríkisstjórninni heimild til að samþykkja viðræður við Ísland.

Fyrir nokkrum dögum ritaði sjávarútvegsstjóri innan framkvæmdastjórnar ESB bréf til stækkunarstjórans í framkvæmdastjórninni og lýsti áhyggjum sínum og sjávarútvegsráðherra ESB-ríkjanna á takmarkalausum makrílveiðum Íslendinga. Töldu Írar freklega vegið að hagsmunum sínum með veiðum makríl hér við land.

Í samþykkt leiðtogaráðs ESB er vísað til áminningar ESA, Eftirlitsstofnunar EFTA, til íslenskra stjórnvalda um nauðsyn þess, að samið sé við Breta og Hollendinga um Icesave-málið. Er ljóst, að ráðið telur nauðsynlegt að leysa það mál, áður en gengið er til aðildarviðræðna við Íslendinga.

Hér var aðildarumsókn Íslands samþykkt á alþingi með þeim rökum, að um könnunarviðræður væri að ræða og síðar mætti taka ákvörðun um, hvort menn litist á það, sem könnunin leiddi í ljós. Innan ESB hefur verið farið með umsókn Íslands eins og aðildarumsóknir annarra landa . Með ákvörðun ráðherrafundarins í dag fá embættismenn ESB umboð til að vinna að því að Ísland gangi í ESB, enda hafi ríkisstjórn Íslands sótt um aðild.