Lene Espersen snýst til varnar - svarar fyrir skróp frá fundum

Lene Espersen, utanríkisráðherra Danmerkur, hefur snúið heim eftir sumarleyfi á Ítalíu og er tekin til við að svara gagnrýni fyrir að hafa ekki lagt nægilega rækt við að sækja utanríkisráðherrafundi. Hún telur, að hún hefði ekki átt að rjúfa sumarleyfi sitt á Ítalíu 26. júlí til að sækja ESB-utanríkisráðherrafund í Brussel. Forverar hennar hefðu ekki gert það, enda sé júlí sumarleyfismánuður í Danmörku.

Lene Espersen og Hillary Clinton, utanríkisráðherra Bandaríkjanna, hittust í Washington 18. júní, 2010

„Gagnrýnin á mig fyrir að sækja ekki fundinn er ómálefnaleg. Það var ekki neitt, sem gerðist á þessum fundi, sem krafðist þess, að ráðherra sæti hann. Þau mál, sem voru mikilvæg fyrir Danmörku, einkum refsiaðgerðir gegn Íran og aðlögunarviðræður við Ísland, runnu í gegn. Menn samþykktu þann texta, sem ég tók sjálf þátt í að semja á fyrri ráðherrafundi,“ segir Lene Espersen við vefsíðun Berlingske.dk.

Hún vísar til þess, að ekki hafi verið fundið að því, að forverar hennar hafi sleppt júlí-ráðherrafundi ESB. „Ég fullyrði, að ekki eru gerðar sömu kröfur. Aðrar kröfur eru gerðar til annarra ráðherra og þriggja fyrrverandi utanríkisráðherra en til mín, þegar rætt er um þátttöku utanríkisráðherra í fundum,“ segir Lene Espersen.

Hún viðurkennir, að hún eigi nokkra sök á því sjálf. „Það er enginn vafi á því, að sjálf á ég nokkra sök á þessu. Að dómsmálaráðherrann en ekki ég sjálf tók þátt í fundi utanríkisráðherrafundi fimm norðurskautsríkja vakti nokkrar umræður sl. vor. Annars hef ég enga skýringu á því, hvers vegna ég á að taka þátt í miklu fleiri fundum en forverar mínir. Málum er einfaldlega þannig háttað,“ sagði Lene Espersen.

Hún hefur látið taka saman lista yfir þá fundi, sem hún hefur sótt, og hina, sem hún hefur sleppt. Hann er birtur á vefsíðu utanríkisráðuneytisins til að ekki hvíli nein leynd yfir neinu, sem málið varðar.

Claus Gruber, ráðuneytisstjóri utanríkisráðuneytisins, hefur sent frá sér yfirlýsingu, þar sem hann segir, að ráðuneytið en ekki ráðherrann hafi ákveðið, að Lene Espersen flaug með einkaþotu til Kabúl. Vélin fékk ekki að lenda á flugvellinum og ráðherrann missti af alþjóðlegum fundi um málefni Afghanistans 20. júlí. Tveir fyrrverandi utanríkisráðherrar höfðu dregið í efa, að Espersen hefði ekki verið með í ráðum. Talið er, að hefði ráðherrann flogið með hervél, hefði hún komist til fundarins.

Ráðuneytisstjórinn segir, að mun ódýrari hafi verið að leigja einkaþotu af Air Alsie til ferðarinnar en fara með Hercules-vél hersins. Auk þess hefði Air Alsie í Sönderborg haft mikla reynslu af því að fljúga til Afghanistan.