Ástandið í Moskvu óbærilegt - Þjóðverjar veita aðstoð

Skyggni í Mosvu er innan 50 metrar vegna reyks og hitasvækju.

Þjóðverjar ætla að senda 100.000 reykgrímur til Moskvu, þar sem loftmengun er óbærileg að mati lækna, vegna reyks frá skógareldum í nágrenni borgarinnar. Síðdegis laugardaginn 7. ágúst hét þýska innanríkisráðuneytið einnig að láta rússneskum björgunarsveitum í té aukinn tækjabúnað til að berjast við elda á 840 stöðum í landinu. Slöngur, dælur og rafmagnsmótorar voru meðal þess, sem verið var að búa til flutnings frá Þýskalandi.

Thomas de Maiziere, innanríkisráðherra Þýskalands, sagði að almannavarnayfirvöld í Rússlandi hefðu farið þess á leit, að Þjóðverjar legðu þeim lið með tækjabúnaði og reykgrímum.

Mosekomonitoring, loftmengunareftirlit Rússland, sagði að kolsýringur í lofti í Moskvu væri 6,6 sinnum hærri en hæfilegt væri. Sums staðar í borginni var skyggni innan við 50 metrar. Því er spáð að mökkurinn hverfi ekki frá Moskvu fyrr en á miðvikudag.

Ivan Yurlov, einn virtasti læknir Rússlands, lýsti áhyggjum sínum í dagblaðinu Kommersant og sagði ástandið vissulega mjög alvarlegt. Fólk byggi nú við óbærilegar aðstæður.

Moskvubúar hafa verið hvattir til að halda sig innan dyra eða yfirgefa borgina að öðrum kosti. Miðar í skipulagðar ferðir til útlanda eru uppseldir og fólk hefur streymt úr borginni í lestum og flugvélum að sögn fjölmiðla.

Á götum úti hefur fólk leitast við að hlífa öndunarfærum sínum með heimatilbúnum grímum, sumir ganga með blauta klúta um vit sín aðrir skurðlæknagrímur. Heilbrigðisyfirvöld hafa sagt, að slíkar grímur séu gagnslausar.

Reykurinn hefur meira að segja smogið ofan í jarðgöng fyrir lestir, en sum þeirra eru allt að 85 metra undir yfirborði jarðar. Það dregur ekki úr vanlíðan Moskvubúa, að hiti í borginni er meiri en mælst hefur í 130 ár, eða frá því að mælingar hófust.

Um 7.000 manna herlið hefur verið kallað á vettvang til að berjast við eldana við hlið björgunarsveita. Hermenn grófu um 8 km langan skurð til að koma í veg fyrir, að eldurinn kæmist í kjarnorkueldflaugastöð í Niznhy Novgorod héraði, að sögn rússnesku útvarpsstöðvarinnar Echo Moskvy á laugardag.

Meira en 50 manns hafa látist vegna eldanna, að sögn stjórnvalda. Hjálparstofnanir telja, að tala látinna verði miklu hærri. Hundruð hafa slasast og þúsundir misst heimili sín.