ESB ver 1.200 m. króna til að þjálfa og „upplýsa“ blaðamenn - áhersla á Íra

ESB er sakað um að stofna til mikils kostnaðar í þeim tilgangi að „stjórna“ evrópskum blaðamönnum. Frá þessu er skýrt í blaðinu The Parliament 6. september, þar sem sagt er frá nýjum upplýsingum um hve langt ESB gengur til að þjálfa og „upplýsa“ blaðamenn . Fram kemur, að ESB varði meira en 8 milljónum evra eða um 1.200 milljónum ISK í þágu blaðamanna á árinu 2009.

Marta Andreasen

Umræður um útgjöld ESB í þágu blaðamanna má rekja til áforma framkvæmdastjórnar ESB um að grípa til nýrra almannatengslaherferðar til að bæta eigin ímynd. Ætlunin er meðal annars að láta ljósmyndara og sjónvarpstökumenn fylgja José Manuel Barroso, forseta framkvæmdastjórnar ESB, allan sólarhringinn auk blaðamanna og fjögurra ræðuritara.

Breska hugveitan Open Europe hefur tekið saman tölur um útgjöld ESB í þágu blaðamanna. Sérfræðingar hugveitunnar telja grunsamlegt, hve mikla alúð ESB lagði við írska blaðamenn í aðdraganda þjóðaratkvæðagreiðslunnar á Írlandi í desember 2009 um Lissabon-sáttmálann. Engu sé líkara en framkvæmdastjórnin sé að kaupa vinsamleg blaðaskrif eða sjónvarpsfréttir.

Fjárhæðirnar, sem varið hafi verið í þágu írskra blaðamanna, veki efasemdir um gildi loforðs framkvæmdastjórnarinnar um að gæta hlutleysis í þingkosningum eða þjóðaratkvæðagreiðslum.

Marta Andreasen, ESB-þingmaður UKIP-flokksins í Bretlandi, segir af þessu tilefni:

„Þar sem ég sit í fjárlaganefndinni er ég meðal hinna fyrstu, sem verð vör við að eyðsluþrá þingsins eru engin takmörk sett, en að eyða fjármunum til að skemmta blaðamönnum er ekki aðeins til marks um lítilsvirðingu við evrópska skattgreiðendur heldur einnig um skammarlegt siðferðisviðhorf. Ég berst fyrir umtalsverðri lækkun á fjárlögum ESB árið 2011 og ég mun auðvitað leggja mig fram um, að þessi misnotkun verði aldrei endurtekin.“

Útgjöld ESB í þágu blaðamanna eru sundurliðuð á þennan veg í The Parliament.

Árið 2009 var að minnsta kosti 8.14 milljónum evra varið beint til að skemmta, þjálfa og „upplýsa“ blaðamenn, 2,6 m. evra var varið í ferðir, gistingu og uppihald.

351.800 evrum (54 m. ISK) var varið í þágu írskra blaðamanna og málstofa um Lissabon-sáttmálann árið 2009, hugsanlega í aðdraganda þjóðaratkvæðagreiðslunnar.

Árið 2009 var að minnsta kosti 710.000 (108 m. ISK) evrum varið í keppni blaðamanna og verðlaun, þar sem allt snerist að sjálfsögðu um mál tengd ESB.

7.500 evrum (1.1 m. ISK) var varið í tvö hanastél.

12.218 evrur (1.8 m. ISK) voru notaðar til að kaupa USB-kubba fyrir blaðamenn á Spáni.

Málsverður á Radisson hóteli í Úruguay undir heitinu „hádegisverður með blaðamönnum“ kostaði 363 evrur (55.000 ISK), en þar dugar fjárhæðin til að greiða þriggja mánaða leigu á íbúð í höfuðborginni Montevideo.

Árið 2010 varði framkvæmdastjórnin einnig 500.000 evrum (7,5 m. ISK) til að kanna gildi nýs Erasmus-verkefnis fyrir blaðamenn, til að „tryggja þjálfun“ á „blaðamönnum sem vinna fyrir ESB-útgáfur og netmiðla, einkum ungum blaðamönnum“ með námsmannaskiptum milli ESB-landa.