ESB gagnrýnir harðlega nýtt ferðamannagjald Bandaríkjanna

14 dollara gjaldtakan nær einnig til Íslendinga

Bandarísk stjórnvöld innheimta nú 14 dollara (1610 ISK) komugjald af ferðamönnum frá ESB-ríkjum, sama regla gildir um ferðamenn frá Íslandi. Gjaldtakan hefur vakið hörð viðbrögð hjá framkvæmdastjórn ESB, sem hugar að gagnaðgerðum að sögn vefsíðunnar EUobserver. Jafnframt gagnrýna ESB-þingmenn harðlega þá aðferð bandarískra yfirvalda að krefjast upplýsinga um greiðslukort þeirra, sem ferðart til Bandaríkjanna.

14 dollara gjaldið kom til sögunnar fyrr í þessum mánuði. Aðeins er unnt að greiða það með korti á netinu. Það nær til ferðamanna frá 23 ESB-ríkjum, sem þurfa ekki vegabréfsáritun til að ferðast til Bandaríkjanna. Ferðamenn frá Búlgaríu, Kýpur. Póllandi og Rúmeníu þurfa enn vegabréfsáritun og greiða þess vegna annars konar gjald.

Framkvæmdastjórn ESB hefur til þessa látið hjá líða að lýsa rafrænu kerfi Bandaríkjamanna til skráningar á ferðamönnum (Electronic Travel Authorisation System (ESTA) sem dulbúnu vegabréfsáritanakerfi. ESB-þingmenn telja hins vegar að svo sé, þar sem þeir ferðamenn, sem fá ekki staðfestingu, eftir að hafa skráð sig í kerfið, sé bannað að fara um borð í flugvél á leið til Bandaríkjanna.

„Við erum kanna öll úrræði, þar á meðal ESB-ESTA-kerfi. Hagkvæmni þess er verið að kanna um þessar mundir, því kynni að verða komið á, ef aðildarríkin vilja,“ sagði Maros Sefcovic, sem situr í framkvæmdastjórn ESB og fer þar með stofnanamálefni.

Framkvæmdastjórn ESB vonar, að Bandaríkjastjórn falli frá gjaldtökunni, þar sem í henni felist „mismunun“ og hún stangist á við öll yfirlýst bandarísk markmið um að auðvelda samskipti þjóðanna beggja vegna Atlantshafs. „Það er einkennilegt að láta ferðamenn greiða fyrir ferðamennsku. Þetta kann að leiða til þess, að ferðamönnum fækki en fjölgi ekki,“ sagði Sefcovic.

Af 14 dollara gjaldinu renna 4 til að reka ESTA-kerfið, en 10 eru skattur til að efla ferðaþjónustu. Tillaga um ferðamannaskattinn kom frá Harry Reid, leiðtoga demókrata í öldungadeild Bandaríkjaþings.

Að sögn EUobserver viðurkenna bnadarískir embættismenn í einkasamtölum, að í því felist þverstæða að ætla að fjölga ferðamönnum með því að leggja á þá auknar álögur. Harry Reid knúði skattheimtuna í gegn fyrr á þessu ári, þegar lagt var hart að honum að styðja tillögur Baracks Obama í heilbrigðismálum.