Framkvæmda­stjórnin vill koma böndum á útgjöld aðildarríkja-búizt við átökum

Á miðvikudag leggur framkvæmdastjórn ESB fram tillögur, sem miða að því að koma böndum á útgjöld einstakra aðildarríkja. Og í dag kemur sérstakur verkefnahópur um sama efni saman til fundar í Brussel. Gert er ráð fyrir töluverðum átökum á milli aðildarríkja um þessar tillögur á sama tíma og vaxandi óánægju gætir hjá almenningi vegna stóraukins aðhalds. Að sögn euobserver í morgun hefur Wolfgang Schauble, fjármálaráðherra Þýzkalands, lýst yfir stuðningi við tillögur framkvæmdastjórnarinnar en Frakkar og Ítalir eru ekki jafn hrifnir af þeim, sérstaklega ekki þeim hluta þeirra, sem fela í sér sjálfkrafa refsiaðgerðir gagnvart aðildarríkjum, sem brjóta settar reglur um hlutfall hallareksturs af fjárlögum og hlutfall þjóðarskulda af vergri landsframleiðslu.

Þær tillögur mundu þýða, að í stað þess að nú þarf tiltekinn meirirhluta til þess að samþykkja refsiaðgerðir gera tillögur framkvæmdastjórnarinnar ráð fyrir, að ákveðinn meirihluta þurfi til að hafna sjálfkrafa refsiaðgerðum.

Financial Times segir í dag, að tillögurnar séu víðtækari en þetta. Þannig sé gert ráð fyrir stöðvun á greiðslum úr þróunar- og landbúnaðarsjóðum til þeirra, sem brjóti ítrekað reglur ESB og atkvæðisréttur verði tekinn tímabundinn af ráðherrum í ráðherraráði ESB frá ríkjum, sem standi ekki við sitt.

Blaðið segir, að Hollendingar og Bretar styðji afstöðu Þjóðverja en Belgar styðji Frakka og Ítali. Finnska dagblaðið Helsingin Sanomat segir í dag að Finnar styðji sjónarmið Þjóðverja. Blaðið segir ennfremur að við núverandi aðstæður mundu sektargreiðslur Finna nema um 340 milljónum evra.

Embættismenn í Brussel segja, að til sé að verða blokk ríkja í suðurhluta Evrópu, sem standi gegn tillögum framkvæmdastjórnarinnar.

Frakkar hafa sérstakar áhyggjur af þeirri áherzlu, sem framkvæmdastjórnin leggur á að skuldir verði lækkaðar. Slíkar aðgerðir mundu t.d. valda Ítölum miklum erfiðleikum en gert er ráð fyrir að skuldir Ítala muni á þessu ári nema 116% af vergri landsframleiðslu.

Humyndir framkvæmdastjórnarinnar um refsiaðgerðir eru þær, að ríki, sem ekki fari að reglum verði að leggja 0,2% af vergri landsframleiðslu inn á sérstakan bankareikning , sem engir vextir yrðu greiddir af og í sumum tilvikum gætu sektir numið 1% af vergri landsframleiðslu.

Á sama tíma og framkvæmdastjórnin ætlar að herða að einstökum ríkjum standa ríkisstjórnir þeirra ríkja, sem verst eru sett frammi fyrir verulegum þjóðfélagsóróa. Á miðvikudag er gert ráð fyrir víðtækum verkföllum á Spáni og búast má við mótmælum í Brussel.