ESB æfir viðbrögð við hryðjuverkum -upplýst um hryðjuverkaáform

ESB hefur æft viðbrögð við hugsanlegri sýkla-árás hryðjuverkamanna á knattspyrnuleiki í Póllandi og Úkraínu. Til æfingarinnar var efnt í sama mund og fréttir bárust um, að al-Kaída hefði skipulagt raunverulegar hryðjuverkaárásir á Bretland, Frakkland og Þýskaland og Norðmenn hefðu handtekið þrjá menn, sem undirbjuggu árásir í Ósló og Kaupmannahöfn.

Að sögn EUobserver efndi ESB til fimmtu alhliða æfingar sinnar gegn hryðjuverkum dagana 27. til 29. september. Látið var á það reyna, hvernig brugðist yrði við af yfirvöldum á sviði heilbrigðismála, samgöngumála, landamæravörslu, löggæslu og almannavarna, ef ráðist yrði með sýklum á knattspyrnuleiki í Póllandi og Úkarínu árið 2012. Frá því var skýrt, að æfingin hefði gengið vel, hugað verði sérstaklega að úrbótum varðandi miðlun upplýsinga og fjarskipti í kjölfar hennar til að stuðla að meiri samhæfingu.

Fréttir um æfinguna bárust daginn (þriðjudaginn 28. september) eftir, að leyniþjónustur Bandaríkjanna og Evrópuríkja gáfu til kynna, að hryðjuverkamenn í Pakistan með tengsl við al-Kaída hefðu undirbúið árásir í Bretlandi, Frakklandi og Þýskalandi.

Árásirnar hefðu átt að vera með svipuðu sniði og árásin árið 2008 í Mumbai á Indlandi, þar sem hópur vopnaðra manna sté á land af bátum og hóf skothríð á vegfarendur á mismunandi stöðum á sama tíma. Þar voru 166 drepnir í árásinni.

The Wall Street Journal segir, að gagn-hryðjuverkastofnanir í Bandaríkjunum og Evrópu hafi fylgst með undirbúningi árásanna síðan í ágúst og þær séu nú að leita að manni, sem er talinn frá Norður-Afríku og þekktur sem „Mauritani“.

„Grimmdarverkið var á fósturstigi,“ sagði breskur embættismaður Associated Press. Hvorki í Bretlandi né Þýskalandi töldu yfirvöld ástæðu til að hækka viðbúnaðarstig gegn hryðjuverkum.

Norska lögreglan skýrði frá því þriðjudaginn 28. september, að tveir menn hefðu játað að hafa undirbúið árás á danska dagblaðið Jylland Posten og á sendiráð Kína í Ósló. Um er að ræða Shawan Sadek Saeed Bujak, 37 ára, íraskan Kúrda með búsetu í Noregi og Mikael Davud, 39 ára norskan ríkisborgara af kínverskum Uighur uppruna. Þá hefur þriðji maðurinn, Uzbeki með norska búsetu, verið sakaður um aðild að málinu.