ESB-stjóri gerir lítið með hryðjuverkaviðvörun Bandaríkjamanna

Hryðjuverkaviðvörun Bandaríkjastjórnar vegna yfirvofandi hættu í Evrópu byggist ekki á neinni breytingu í öryggsmálum eða mati og ætti ekki að leiða til þess, að ríkisstjórnir ESB-landa taki upp nýjar aðferðir til að verjast hryðjuverkaógninni að mati Vivian Reding, dómsmálastjóra ESB.

Á ráðstefnu á vegum þýsku hugveitunnar Konrad Adenauer Stiftung í Berlín 5. október sagði Reding, að evrópskir ráðherrar hefðu þegar sagt, að ekkert nýtt lægi að baki viðvörun Bandaríkjamanna um hættu á hryðjuverkum. Ógnin af hryðjuverkamönnum hefði legið fyrir í nokkur ár. Dómstólastjórinn sagði, að úr því að ekkert hefði breyst væri ástæðulaust fyrir ESB og aðildarlöndin að taka upp nýjar aðferðir. Haldið yrði áfram eins og áður við að greina líkur á árás og búa sig undir gagnráðstafanir í samræmi við þá greiningu.

Reding vísaði til þess, sem haft var eftir Thomas de Maiziere, innanríkisráðherra Þýskalands, sem hafði varað við því að verða óttasleginn vegna viðvörunar Bandaríkjastjórnar sunnudaginn 3. október.

Í frétt EUobserver í tilefni af orðum Reding í Berlín segir, að ekki séu allir á sama máli og hún um, að ekki sé ástæða til meiri árvekni. Svíar og Bretar hafi undanfarna daga sent frá sér svipaðar viðvaranir og Bandaríkjamenn til þeirra, sem ætla að ferðast til Þýskalands og Frakklands. Japanir og Ástralir hafa gripið til hins sama. Gagnvart bandarískum ferðamönnum hefur viðvörun yfirvalda leitt til þess, að þeim, sem láta af sér vita með því að hafa samband við bandarískar ræðisskrifstofur, hefur fjölgað úr 2.000 í 8.000 á dag.

Innanríkisráðherrar ESB-ríkjanna hittast á fundi í Lúxemborg fimmtudaginn 7. október. Þangað kemur einnig Jane Holl Lute, aðstoðar-heimavarnaráðherra Bandaríkjanna, sem mun veita frekari upplýsingar um hryðjuverkaviðvörunina.