Cameron stefnir á meiri niðurskurð en Thatcher

Takist áform hans leiða þau til grundvallar­breytinga í brezku efnahagslífi

David Cameron

Ríkisstjórn Camerons í Bretlandi hefur tekið allt aðra stefnu í ríkisfjármálum heldur en ríkisstjórn Obama í Bandaríkjunum. Á miðvikudag í næstu viku mun hin nýja ríkisstjórn Bretlands gera grein fyrir tillögum sínum um niðurskurð í opinberum útgjöldum á næstu árum og er talið, að þær tillögur feli í sér meiri niðurskurð útgjalda en Margrét Thatcher beitti sér fyrir í upphafi níunda áratugarins. Þetta er allt önnur stefna en Obama hefur markað, sem byggir á mun hægari niðurskurði opinberra útgjalda en stefnt er að í Bretlandi.

Meðal þess, sem talið er að brezka ríkisstjórnin muni kynna í næstu viku eru áform um að leggja niður 192 stjórnarstofnanir. Talið er að tillögur ríkisstjórnar Cameons muni þýða að 600 þúsund opinberir starfsmenn í Bretlandi missi vinnu sína fram til ársins 2015.

Þess ber hins vegar að geta í samanburði á milli Bretlands og Bandaríkjanna að talið er að 51,5% af vergri landsframleiðslu Bretlands eigi rætur að rekja til opinberra umsvifa en sambærileg tala í Bandaríkjunum er 41% og meðaltalið í ESB-ríkjum er 50,7%.

Á móti þessum miklu niðurskurðaraðgerðum stefnir Cameon að því að örva og hvetja einkageirannn m.a. með skattalækkunum til nýrra átaka og fjölgunar starfsmanna, ekki sízt í norðurhluta Englands, þar sem atvinnuleysi er mun meira en í suðurhluta landsins og tekjur á mann mun lægri. Þar eru m.a. hugmyndir um að byggja upp orkufyrirtæki, sem byggist á vindorku.

Frá þessu er sagt í Wall Street Journal í dag, sem segir, að heppnist þessi áform Camerons muni það hafa í för með sér grundvallarbreytingu á brezku efnahagslífi og styrkja stöðu Íhaldsflokksins. Mistakist þau muni nýtt samdráttarskeið ganga yfir Bretland með auknu atvinnuleysi.