Síðasta haftið brotið í lengstu lestargöngum heims - 57 km í Sviss

Föstudaginn 15. október klukkan 12.17 að íslenskum tíma var borað í gegnum síðasta haftið í lengstu neðanjarðargöngum heims. Þau eru 57 km löng í svissnesku Ölpunum og gerð fyrir stórar flutninga- og hraðlestir.

Svisslendingar kenna göngin við Gotthard-Basis. Þau munu stytta lestarferð milli Zürich og Mílanó, sem nú tekur þrjá og hálfan tíma um klukkustund. Lestargöngin verða tekin í notkun eftir sjö ár, 2017, en gerð þeirra hófst fyrir 15 árum. Átta menn hafa týnt lífi við framkvæmdina.

Svissensku járnbrautirnar

Gömlu göngin í Gotthard-skarðinu hafa dugað í eina öld. Lestarferð með þeim er um stórbrotið og fagurt landslag.

Framkvæmdatíminn er 32 ár og kostnaðurinn til þessa nemur um eitt þúsund milljörðum íslenskra króna. Ákveðið var í þjóðaratkvæðagreiðslu að svissneska ríkið skyldi standa straum af kostnaði við gerð ganganna. Markmiðið er að draga úr umferð vöruflutningabifreiða um Sviss. Hún veldur í senn truflun á vegum og mengun.

Nálægt nýju göngunum eru tvö eldri göng undir St. Gotthard skarðið, lestargöng frá 1881 og bílagöng frá 1980. Göngin eru ein hin mikilvægustu í gegnum Alpana. Hefur umferð um bílagöngin meira en tífaldast síðan þau voru gerð.

Lestargöngin frá 1881 eru svo hátt í fjöllunum, að tvær eimreiðar þarf til að draga vagna með 1.400 tonn upp í þau í 1100 metra hæð. Ein eimreið mun hins vegar duga í nýju göngunum til að draga 4000 tonn í gegnum göngin, sem eru í 600 metra hæð. Þá geta farþegalestir farið á 250 km hraða í gegnum nýju göngin.