Hvers vegna kemur Finnland svona vel út úr Pisakönnunum?

Hvers vegna kemur Finnland svona vel út úr Pisa-könnunum, sem OECD stendur fyrir til þess að kanna læsi og þekkingu í stærðfræði 15 ára unglinga um víða veröld? Finnland er í öðru sæti í alþjóðlegum samanburði, sem hefur leitt til þess að í skýrslu OECD er sérstakur kafli um Finnland, þar sem leitazt er við að draga fram skýringar á sterkri stöðu Finna. Kennarar og annað skólafólk úr öllum heiminum ferðast til Finnlands til þess að kynna sér stöðu mála þar. Um þetta er fjallað á vefmiðlinum euobserver.

Í skýrslu OECD kemur fram, að árangur Finna er afleiðing af markvissu starfi á þessu sviði í fjóra áratugi. Grundvallaratriði er jafnræði í skólakerfinu. Öllum sveitarfélögum er skylt að sjá fyrir leikskólum fyrir börn. Öll börn eiga rétt á ókeypis skólagöngu frá sex ára aldri. Ríkisskólar velja ekki úr. Öllum börnum er tryggður aðgangur að skóla ekki fjarri heimili sínu. Kostnaður heimila við skólagöngu barna er nánast enginn. Þetta á við um námsgögn, mat í skóla, heilsugæzlu, sérkennslu og ferðakostnað í skóla í dreifðari byggðum. Öll börn þar á meðal börn með sérþarfir fá sömu grundvallarmenntun. Skólarnir hafa náð góðum árangri í því að fást við vandamál nemenda, sem hætt er við að hætti námi eða eiga við félagsleg vandamál að stríða. Allir skólar eru með sálfræðinga í sinni þjónustu. Þjóðfélagsstaða hefur ekki áhrif á árangur nemenda í skóla gagnstætt því sem er í ýmsum nálægum löndum.

Skólakerfið hefur náð góðum árangri í því að ýta undir nemendur, sem standa höllum fæti í námi, sem virðist jafnframt hafa ýtt undir árangur betri nemenda. Sá aldursflokkur, sem könnunin nær til fylgist vel með þjóðfélagsmálum. Um 85% þeirra lesa dagblöð nokkrum sinnum í hverjum mánuði.

Kennarar njóta mikillar virðingar í Finnlandi. Miklar menntunarkröfur eru gerðar til þeirra og kennsla í grunnskólum er eftirsótt starf í Finnlandi. Almenningur treystir kennurum, þeir treysta nemendum og þeir búa við mikið sjálfstæði í starfi.