Martin Wolf: Þýzkaland ræður en hvernig nota þeir valdið?

Einkageirinn er Akkilesarhællinn- ekki ríkisfjármálin

„Þýzkaland ræður. Það ræður vegferð evrusvæðisins og jafnvel, hvort evran lifir. Þýzkaland er lykilveldi í Evrópu, landfræðilega, pólitískt og efnahagslega. Og þetta veit Frakkland. Spurningin er hvernig Þýzkaland notar þetta vald.“

Þannig hefst grein eftir Martin Wolf, eins helzta sérfræðings Financial Times um efnahagsmál í blaði hans í dag. Greinin birtist á FT.com í gærkvöldi.

Höfundur vitnar í þýzkan starfsbróður sinn Wolfgang Munchau, sem telji að markmið þýzku ríkisstjórnarinnar sé annars vegar að gera nógu mikið til að halda evrunni á floti en hins vegar að það kosti þýzka skattgreiðendur sem minnst. Þessi markmið séu hins vegar umdeild í Þýzkalandi. Forystumenn jafnaðarmanna þar í landi vilji fara mildari leið en Angela Merkel hafni því. Hún vilji harðan fjárhagslegan aga, takmarkaða fjármögnun með háum vöxtum fyrir þær þjóðir, sem á því þurfi að halda, sem knýi þær til harðra aðhaldsaðgerða.

Martin Wolf segir að grundvallaratriði til að skilja vanda evruríkjanna sé að átta sig á, að hann snúist ekki um ríkisfjármál nema í tilviki Grikklands. Það sé einkageirinn sem sé Akkilesarhællinn. Þetta sé staðfest í nýrri skýrslu frá OECD. Staða ríkisfjármála á Írlandi og á Spáni hafi verið sterk. Það hafi verið einkageirinn, sem hafi misst tökin á sjálfum sér í lántökum, þótt ríkisfjármál hafi farið úr böndum þegar fjármálakreppan skall á. Verkefnið sé tvíþætt, að fást við aðkallandi vanda og marka langtímastefnu. Hvort sameiginleg stefna í ríkisfjármálum sé nauðsynleg til lengri tíma sé umdeilt.

Höfundur segir, að það evrusvæði, sem Þjóðverjar stefni að verði mjög óþægilegt fyrir marga meðlimi þess. Þjóðverjar verði hins vegar að veita forystu. Mistakist þeim kunni þeir að missa evruna úr höndum sér.