Bændablaðið: hjáleið notuð til að ríkið fái fjárstyrki frá ESB

Jón Bjarnason ekki upplýstur um styrki á sínu verksviði

Þrátt fyrir yfirlýsingar nokkurra ráðherra vinstri-grænna, þar á meðal Jóns Bjarnasonar, sjávarútvegs- og landbúnaðarráðherra, um að ekki verði þegnir aðlögunar- eða upplýsingastyrkir frá Evrópusambandinu á tíma aðildarviðræðna við það, er unnið að umsóknum um slíka styrki á verksviði sjávarútvegs- og landbúnaðarráðuneytisins. Þetta kemur fram í Bændablaðinu frá 13. janúar, en þar segir að um tvo svonefnda TAIEX-styrki sé að ræða.

Jón Bjarnason sagði í samtali við Bændablaðið að hann hefði ekki vitneskju um að unnið væri að umsóknum um þessa tvo styrki, annars vegar vegna sérfræðiþjónustu við gerð landupplýsinga og hins vegar vegna greiðslustofu í landbúnaði. Áréttaði Jón í Bændablaðinu að sl. haust hefði hann sagt að „ekki yrði sótt um slíka styrki af hálfu hans ráðuneytis“ þá vísaði hann til samþykkta flokks Vinstri grænna.

Í Bændablaðinu segir að innan ríkisstjórnarinnar hafi náðst samkomulag um að aðalsamninganefnd Íslands og samningahópar geti haft frumkvæði að því að semja umsóknir um TAIEX styrki og beint því til utanríkisráðuneytisins að sækja um slíka styrki. Hins vegar hafi ekki náðst samkomulag á vettvangi ríkisstjórnarinnar um svokallaða IPA-styrki, sem fela í sér beinan fjárstuðning ESB til aðlögunar að ESB-reglum.

Haraldur Benediktsson, formaður Bændasamtaka Íslands, segir í leiðara Bændablaðsins í tilefni af þessum styrkjum:

„Embættismenn undirbúa umsóknir um styrki til að undirbyggja ESB-stjórnsýslu hér á landi, þrátt fyrir yfirlýsingar ráðherra um að ekki eigi að nota fjármuni ESB til þeirra verka. Hópar fólks eru fluttir úr landinu í klæðskerasaumaðar lúxus- og áróðursferðir. Þar er, að sögn, allt greitt og veitt vel.... Háskóli Íslands, eitt af sameiningartáknum þjóðarinnar, er á aldarafmæli sínu verktaki við að koma “réttum„ upplýsingum um ESB á framfæri.“