Nýtt pólskt borðspil um skort og biðraðir í tíð kommúnista

Nýju pólsku borðspili er ætlað að endurskapa svarta markaðinn og langar biðraðir undir stjórn kommúnista í landinu. Þátttakendur í spilinu reyna að kaupa nauðþurftir en birgðir eru á þrotum þegar þeir koma að afgreiðsluborðinu eða einhver með sambönd kemur á vettvang.

Nýja spilið var kynnt laugardaginn 5. febrúar undir heitinu „Kolejka“ sem er biðröð á pólsku. Það er gert af Þjóðminningarstofnun Póllands og því er ætlað að minna á ömurleika daglegs lífs í Póllandi áður en kommúnistar fóru frá völdum árið 1989.

„Við viljum sýna raunsanna mynd af lífinu í Póllandi á þessum árum – af svarta markaðnum, löngu biðröðunum og því hvernig fólk í röðinni leit á hvert annað sem andstæðing,“ sagði Karol Madaj, höfundur spilsins, við þýsku fréttastofuna dpa. „Jafnvel þótt spilið byggist aðeins á tölum og litum, höfum við lagt okkur fram um að skapa andrúmsloft þessa tíma.“

Þátttakendur leika á hvern annan til að komast áfram í röðinni til að tryggja sér lífsnauðsynjar eins og skó eða brauðhleifa. Hver þeirra er með nokkur kort á hendi, sem veitir þeim ákveðið forskot. Á einu kortinu er til dæmis móðir með barn á handleggnum, sem leyfir þátttakendum að færa sig fremst í röðina.

„Fyrir okkur vakir að sýna ungu fólki, sem hefur ekki kynnst þessu af eigin raun, hve erfiðir þessir tímar voru, og hvað foreldrar þeirra eða afar og ömmur urðu að leggja á sig til að kaupa venjulega hluti til daglegra nota,“ sagði Madaj. Hann var níu ára þegar kommúnistar fóru frá völdum í Póllandi. Við gerð spilsins studdist Madaj við minningar frá þeim tíma þegar hann stóð við hlið móður sinnar í biðröðum. Sagnfræðingar aðstoðuðu hann og leitast var við að gera spilið eins raunverulegt og frekast var unnt.