Forsætis­ráðherra Dana: búum okkur undir að taka afstöðu til evrunnar

Lars Lökke Rasmussen

Áform evru-landanna um að auka samstarf sitt getur leitt til þess að Danir verði að taka afstöðu til þess í þjóðaratkvæðagreiðslu hvort þeir eigi að standa áfram utan við samstarfið, sagði Lars Lökke Rasmussen, forsætisráðherra Dana, í umræðum á danska þinginu miðvikudaginn 9. febrúar. Hann vísaði þar til tillögu Þjóðverja og Frakka um samkeppnishæfni-sáttmála fyrir evru-löndin.

„Við erum ekki evru-land, þótt krónan okkar sé föst við evruna. Við höfum gert fyrirvara. Nú sjáum við hins vegar meginlínur samstarfs innan evru-svæðisins, sem ná bæði til umfangs og dýptar, og sem kunna mjög líklega að knýja á um mat okkar á eigin stöðu gagnvart evrunni,“ sagði ráðherrann.

Hann lagði þó jafnframt áherslu á að ríkisstjórnin hefði ekki tekið neina ákvörðun um að tekið yrði af skarið um evruna fyrir Dani, sem ekki yrði gert nema í þjóðaratkvæðagreiðslu.

„Það er of snemmt að slá nokkru föstu. Í byrjun mars verður leiðtogafundur evru-ríkjanna, en þegar hefur verið lagður grunnur að einhverjum, sem við, sem myndum ESB-meirihluta á þingi, verðum að hafa náið auga með. Það getur kallað á að við verðum að endurmeta afstöðu okkar til evrunnar og hvenær við tökum afstöðu til hinna dönsku fyrirvara,“ sagði hann.

Ummæli forsætisráðherrans fylgdu í kjölfar þess sem hann sagði þriðjudaginn 8. febrúar um að danska ríkisstjórnin stefndi eindregið að því að hafa sitt að segja um hinn nýja evru-sáttmála – án þess þó að taka afstöðu til þess hvort Danir ætli að gangast undir skilmála sáttmálans þegar hann hefur verið gerður.

Sósíaliski þjóðarflokkurinn og Danski þjóðarflokkurinn hafa sagt að Danir geti ekki tekið á sig skuldbindingar samkvæmt nýjum evru-sáttmála án þess að efnt verði til þjóðaratkvæðagreiðslu um evru-fyrirvarann.