Lánakostnaður Portúgala úr böndunum - ótti vegna evrunnar vex

Lánakostnaður í Portúgal hækkar nú mjög eftir nokkurra vikna ró á fjármálamörkuðum vegna skuldavandans á evru-svæðinu. Sérfræðingar krefjast skjótra viðbragða.

Í danska blaðinu JyllandsPosten segir að vextir á ríkisskuldabréfum í Portúgal hafi hækkað mjög hratt og þeir nálgist nú óðfluga sama stig og knúði Íra til að leita aðstoðar og samþykkja neyðaraðstoð frá ESB og Alþjóðagjaldeyrissjóðnum (AGS).

Til samanburðar má geta þess að vextir á 10 ára þýskum ríkisskuldabréfum séu í raun 3,27%.

Vaxtahækkunin er til marks um ótta fjárfesta við að ríkisstjórn Portúgals takist ekki að ná tökum á efnahagsvanda þjóðarinnar. Ítrekuð áhersla á vegum ESB til að finna heildarlausn á skuldavanda evru-svæðisins hefur undanfarnar vikur dugað til að skapa ró vegna vanda Spánar, Ítalíu og Belgíu.

Richard McGuire, vaxtasérfræðingur við hollenska stórbankann Rabobank, segir að vaxtahækkunin á portúgölsku ríkisskuldabréfunum gæti verið til marks um að skuldvandinn sé að magnast að nýju á evru-svæðinu.

„Við erum að nýju á sama stað og áður þar sem þeir [ESB-stjórnmálamenn] lofa einhverju án þess að lýsa því í smáatriðum sem fyrir þeim vakir. Ég tel að á markaði hafi menn í vaxandi mæli áhyggjur af þróuninni eins og gerðist áður en veitt var aðstoð til Grikklands og Írlands,“ segir Richard McGuire við Financial Times.

Annar sérfræðingur segir að í raun sé engin spurn eftir ríkisskuldabréfum Portúgals. Þessi sérfræðingur vill ekki láta nafns síns getið en hann segir við Financial Times, að lánakostnaður Portúgala eigi eftir að hækka enn frekar þar sem enginn vilji skuldabréf þeirra.

Ríkisskuldir Portúgala eru ekki eins háar og Grikkja og Íra sem hlutfall af efnahag þjóðarinnar. Á hinn bóginn eru líkur á hagvexti í Portúgal svo litlar og samkeppnishæfni Portúgala svo léleg að þjóðin býr við þá hættu að skuldabyrðin verði henni ofviða.

Heimild: JyllandsPosten