Tæplega 200 hagfræðiprófessorar leggjast gegn evru-leið Merkel

Tæplega 200 þýskir hagfræðiðprófessorar hafa ritað undir yfirlýsingu og hafnað þeim tillögum sem nú liggja fyrir um lausn á skuldavanda evru-svæðisins. Þeir vilja þess í stað að mótuð verði leið fyrir þjóðir í vanda til að lýsa sig gjaldþrota.

„Við hvetjum þýsku ríkisstjórnina til að grípa til ráðstafana ef evrópski björgunarsjóðurinn dugar ekki og vinna hratt að því með ESB-félögum sínum að móta nákvæma áætlun um hvernig grípa skuli á gjaldþroti stórskuldugra evru-ríkja,“ segir í yfirlýsingu sem birtist í þýska dagblaðinu Frankfurter Allgemeine Zeitung fyrir skömmu.

Meira en 200 prófessorum var boðið að rita undir yfirlýsinguna og 189 gerðu það, þar á meðal þjóðkunnir fræðimenn á borð við Manfred Naumann við háskólann í Bonn og Justus Haucap við háskólann í Düsseldorf.

Prófessorarnir telja betra að einstök ríki semji um uppgjör á skuldum sínum og gangi í gegnum gjaldþrotameðferð ef svo ber undir frekar en að breyta evru-björgunarsjóðnum í varanlega stofnun eftir árið 2013 eins að er stefnt. Með því lækki ríkin skuldir sínar og geti hafið nýja vegferð.

Sú leið sem leiðtogar ESB-ríkjanna séu nú að skoða og kunni að samþykkja undir lok mars feli í sér „varanlega ábyrgð“ á skuldum sumra ríkja sem hefði „,mjög alvarlegar afleiðingar“ að mati prófessoranna.

Í yfirlýsingu þeirra er einnig lýst efasemdum um aðgerðir til að auka samkeppnishæfni þeirra ríkja á evru-svæðinu sem standa höllum fæti og til að hlutast til um ríkisfjármál þeirra vegna þess hve Evrópusambandið búi yfir litlum „áhrifamætti“.

Yfirlýsingin birtist um sama leyti og þingmenn í flokki Angelu Merkel, kanslara Þýskalands, hafa sterklega varað við því að hinn varanlegi björgunarsjóður evrunnar geti keypt ríkisskuldabréf skuldsettra evru-ríkja, eins og framkvæmdastjórn ESB og Seðlabanki Evrópu vilja.