Bretar geta „grafið undan“ mannréttindadómstólnum segir Jagland

Thorbjörn Jagland, framkvæmdastjóri Evrópuráðsins og fyrrverandi forsætisráðherra Noregs, hefur áhyggjur af afleiðingum þess ef Bretar ákveða að hafa að engu Mannréttindadómstól Evrópu í Strassborg sem starfar innan vébanda Evrópuráðsins og hefur það hlutverk að tryggja hollustu aðildarþjóða ráðsins við mannréttindasáttmála Evrópu.

Thorbjörn Jagland

Í viðtali við vefsíðuna EUobserver sem birtist miðvikudaginn 2. mars segir Jagland að stígi Bretar það skref að hafna lögsögu dómstólsins kunni það að leiða til keðjuverkunar til að „grafa undan“ áhrifum hans.

Þingmenn breska Íhaldflokksins sætta sig illa við að hlíta niðurstöðu mannréttindadómstólsins frá 2005 sem leiðir til þess að breyta þarf breskum lögum um kosningarétt fanga. Sett hefur verið á fót þingnefnd í Bretlandi til að huga að setningu sérstakrar mannréttindaskrár fyrir Bretland, sem hafi æðri réttarstöðu en mannréttindasáttmáli Evrópu. Innan Frjálslynda flokksins er andstaða við að ganga gegn dómstólnum í Strassborg.

Breska ríkisstjórnin hefur ekki tekið undir kröfur þingmanna sem vilja segja Breta undan lögsögu mannréttindadómstólsins. Hún hefur hins vegar hvatt til endurskipulagningar á dómstólnum, þar sem tugir þúsunda mála bíða afgreiðslu.

Jagland fagnar áhuga ríkisstjórnarinnar í London á því að breyta reglum um dómstólinn. Þar sé mikil þörf fyrir endurbætur. Huga þurfi að leiðum til að unnt sé að afgreiða kærur til hans innan viðunandi tímafrests auk þess sem nauðsynlegt sé að ræða hve „víðtæk túlkunin á mannréttindasáttmálanum eigi að vera“ eins og segir í viðtalinu við EUobserver.