Síðbúin ESB-fiskifrétt Fréttablaðs þegar þing­nefndir ræða rýnifundi

Aðalsteinn Leifsson

Sama dag, 11. mars og efnt er til sameiginlegs fundar utanríkismálanefndar og sjávarútvegs- og landbúnaðarnefndar alþingis að ósk þingmanna Sjálfstæðisflokksins til þess að fara yfir stöðu mála að loknum ESB-rýnifundunum sem haldnir hafa verið um sjávarútvegsmál birtir Fréttablaðið forsíðufrétt um reglugerð frá ESB frá 18. janúar 2011, sem blaðið túlkar á þann veg, að aðildarríki ESB geti „ákvarðað einhliða hámarksafla úr stofnum sem eru alfarið nýttir af viðkomandi ríki, í stað þess að tekin sé sameiginleg ákvörðun í ráðherraráðinu eins og átt hefur við hingað til“.

Í fréttinni er sagt nánar frá efni reglugerðarinnar og skýringu framkvæmdastjórnar ESB á henni. Þar kemur fram að framkvæmdastjórnin sækist eftir „ráðgjöf hagsmunaaðila við að færa stjórn aflaheimilda, sem varða aðeins eitt aðildarríki, undir viðkomandi ríki“.

Vald aðildarríkisins er takmarkað á þann veg að það skal vera í samræmi við meginreglu sjávarútvegsstefnu ESB um sjálfbæra nýtingu auk þess sem nýta ber stofninn með sem mestan ávinning í huga. Þá ber ríkinu að miðla upplýsingum til ESB og leggja rækt við góða stjórnunarhætti.

Fréttablaðið ræðir við Aðalstein Leifsson, stjórnmálafræðing og lektor við viðskiptadeild Háskólans í Reykjavík. Aðalsteinn er fylgjandi aðild Íslands að ESB og segir „reglugerðina styrkja stöðu Íslands í sjávarútvegsmálum“.

Aðalsteinn fullyrðir í Fréttablaðinu að „enginn ágreiningur“ sé um það að „samkvæmt reglum ESB eigi ekkert annað ríki tilkall til veiðiréttinda á botnfiski umhverfis Ísland á grundvelli sögulegrar veiðireynslu“. Þá segir Aðalsteinn:

„Þessi reglugerð bætir um betur og gefur Íslandi að minnsta kosti tækifæri til að setja fram og rökstyðja þá kröfu að ákvörðun um hámarksafla í botnfiski í íslenskri lögsögu verði eftir sem áður í höndum íslenskra stjórnvalda, enda verði sóknin í fiskistofnana áfram ábyrg og skili sem mestum efnahagslegum ávinningi.“