ESB-þingmenn ósáttir við breytingar á ungverskum fjölmiðla­lögum

ESB-þingmenn hvöttu ríkisstjórn Ungverjalands til þess á fundi í Strassborg fimmtudaginn 10. mars að afnema eða breyta enn frekar umdeildum fjölmiðlalögum sem tóku gildi 1. janúar 2011 og hefur eini sinni verið breytt að ósk framkvæmdastjórnar ESB. Í Búdapest brugðust stjórnmálmenn við á þann veg að saka ESB-þingmennina um „galdraofsóknir“.

Fáni Ungverjalands

Í ályktun sem samþykkt var á ESB-þinginu segir, að „afnema“ beri ungversku fjölmiðlalögin eða endurskoða enn frekar, vegna þess að ÖSE, Öryggissamvinnustofnun Evrópu, hefði gert alvarlegar athugasemdir við lögin, einkum eftirlit með fjölmiðlum.

Stjórnvöld Ungverjalands verða að „endurvekja sjálfstæða stjórn fjölmiðla og binda enda á ríkisafskipti,“ segir í ályktun ESB-þingsins.

ÖSE gaf yfirlýsingu á þriðjudag 8. mars um að enn mætti misnota ungversku lögin til að þagga niður sérsjónarmið í Ungverjalandi.

Ungverska þingið hafði daginn áður, mánudaginn 7. mars, afgreitt breytingu á ákvæðum fjölmiðlalaganna um skráningu fjölmiðla og „jafnvægi“ í fjölmiðlun og brugðist á þann hátt við aðfinnslum Evrópusambandsins.

Við endurskoðun laganna var ekki hróflað við ákvæðum þeirra um fjölmiðlaráð, sem hefur eftirlit með allri fjölmiðlun og er eingöngu skipað nánum samstarfsmönnum Viktors Orbans, forsætisráðherra, að sögn gagnrýnenda.

Zoltan Kovacs, fjarskiptaráðherra Ungverjalands, sagði að ályktun ESB-þingsins sýndi að „galdraofsóknirnar“ héldu áfram og ESB-þingmönnunum væri sama um breytingarnar sem ungverska þingið hefði gert á lögunum. Breytingarnar hefðu tekið mið af óskum frá Neelie Kroes, í framkvæmdastjór ESB. Þeir sem hefðu staðið að ályktun þingsins ættu að ræða við framkvæmdastjórn ESB en ekki ríkisstjórn Ungverjalands.