Afdráttarlaus andstaða gegn ESB-aðild samkvæmt nýrri könnun MMR

Kjósendur Samfylkingar­innar eini sérgreindi hópurinn sem vill aðild

Allir sérgreindir hópar sem spurðir eru um afstöðu til ESB-aðildar Íslands í nýrri könnun eru á móti henni nema þeir sem ætla að kjósa Samfylkinguna. Mest er andstaða meðal bænda og sjómanna, þar er enginn hlynntur aðild. Höfuðborgarbúar, landsbyggðarbúar, iðnaðarmenn, háskólamenntaðir og stjórnendur, allir eru andvígir aðild að ESB auk kjósenda Framsóknarflokks, Sjálfstæðisflokks og vinstri-grænna.

Þessi mynd birtist á vefsíðu ESB-þingsins, þegar sagt frá samþykkt þess um viðræður við Ísland.

Viðskiptablaðið birtir 17. mars könnun á viðhorfi almennings til Icesave III og aðildar að Evrópusambandinu. 65% þeirra sem tóku afstöðu eru á móti ESB-aðild, 35% fylgjandi. Tæp 15% eru hvorki fylgjandi aðild né andvíg. Naumur meirihluti, 52% er fylgjandi lögunum um Icesave III sem verða borin undir atkvæði þjóðarinnar 9. apríl, 48% eru á móti, vikmörk eru 3,8%.

Um 37% þeirra sem búsettir eru á höfuðborgarsvæðinu vilja ganga í ESB en aðeins 19% á landsbyggðinni. 70% landsbyggðarfólks er á móti aðild að ESB og 47% þeirra sem búa á höfuðborgarsvæðinu. 40% þeirra sem lokið hafa háskólaprófi eru með aðild en 45% á móti.

Andstaða við ESB-aðild er mest meðal bænda og sjómanna 88%. Enginn úr hópi bænda eða sjómanna sem tók þátt í könnuninni lýsti sig fylgjandi aðild að ESB. Meðal iðnaðarmanna er andstaðan rúm 70%.

Helsti stuðningur við aðild að ESB er meðal sérfæðinga 43% en 46% þeirra eru á móti. 38% stjórnenda eru með aðild en 52% á móti.

Um 88% þeirra sem styðja Samfylkinguna vilja aðild að ESB. Er þetta eini sérgreindi hópurinn sem er hlynntur aðild. 80% framsóknarmanna er á móti aðild, 70% sjálfstæðismanna og 60% vinstri-grænna.

Í könnuninni kemur fram að meirihluti sjálfstæðismanna myndi hafna Icesave-lögunum ef kosið yrði nú, 59,1% sjálfstæðismanna eru á móti lögunum en 40,9% með þeim. Stuðningur við Icesave III er mestur í Samfylkingunni 89,9% og 84,4% meðal vinstri grænna, en minnstur meðal framsóknarmanna 25,5%.