DT: „Skotland væri jafn mikið á hausnum og Ísland“

Sjálfstætt Skotland hefði ekki þolað fall skozku bankanna, segir Daily Telegraph

Skotland væri jafn mikið á hausnum og Ísland segir í Daily Telegraph í dag, ef það hefði verið sjálfstætt, þegar tveir stórir skozkir bankar komust í þrot og segir að það sama eigi við um samanburð við Írland. Í grein blaðsins er vísað til þess, þegar Royal Bank of Scotland og HBOS, sem báðir eru skráðir í Skotlandi, komust í þrot. Brezkir skattgreiðendur hafi þurft að greiða 70 milljarða sterlingspunda með þessum bönkum. Greinarhöfundur, sem er Jeremy Warner einn af aðstoðarritstjórum blaðsins, segir, að þetta hafi verið skozk bankakrísa en ekki brezk. Upphæðin, sem bankarnir þurftu að fá hefði verið hærri ef allur íbúafjöldi Bretlands hefði ekki staðið að baki henni en íbúafjöldi Skotlands sé ekki nema helmingur þeirra, sem búa í London.

Blaðið segir ennfremur, að hefði Skotland verið sjálfstætt ríki mætti telja víst að það hefði þá þegar tekið upp evru og þar með engin augljós leið til björgunar. Forsætisráðherra Skotland mundi í slíku tilviki nú þegar hafa farið þess á leit við Englendinga, að þeir tækju Skota upp á sína arma.

Þá segir, að hugmyndir um að bankarnir hefðu verið undir sterkara eftirliti í sjálfstæðu Skotlandi séu áhugaverðar en fáránlegar. Klíkuskapurinn í Edinborg sé jafnvel meiri en í Dublin á Írlandi.

Þá fjallar greinarhöfundur um stöðu Skotlands ef engin bankakrísa hefði orðið og segir að lífskjör í Skotlandi mundu versna mjög ef þeir færu sína eigin leið. Ókeypis háskólanám og ókeyps lyf mundu heyra sögunni til.

Loks segir höfundur greinarinnar að fleiri Evrópulönd eigi við að stríða það sem hann kallar skozkt vandamál. Hann nefnir Ítalíu og að norðurhluti Ítalíu hafi alltaf haldið suðurhlutanum uppi. Og einnig Þýzkaland og samskipti hins gamla Vestur-Þýzkalands við austurhlutann.