Eva Joly gagnrýnir fjármála­ráðherra Frakka vegna gruns um spillingu

Christine Lagarde, fjármálaráðherra Frakka, sætir nú lögreglurannsókn vegna afskipta sinna af uppgjöri franska ríkisins við Bernard Tapie, einn umdeildasta stjórnmála- og kaupsýslumann í Frakklandi.

Eva Joly, ESB-þingmaður og hugsanlegur forsetaframbjóðandi franskra græningja í forsetakosningunum 2012, segir að Lagarde kunni að hafa fengið „fyrirmæli“ frá Nicolas Sarkozy, forseta Frakklands, um að gera upp við Tapie. Hún segir að samkomulagið við Tapie hafi verið óeðlilegt og rannsaka verði tildrög þess. „Þetta gæti verið spillingarmál,“ segir Joly.

Christine Lagarde

Christine Lagarde (55 ára) nýtur virðingar fyrir störf sín sem fjármálaráðherra langt út fyrir Frakkland. Hún birtist oft í sjónvarpsviðtölum í Bandaríkjunum og Bretlandi. Enskukunnátta hennar mótast meðal annars af því að hún starfaði á sínum tíma sem lögfræðingur í Chicago. Í minningum sínum um bankahrunið 2008 ber Árni M. Mathiesen, þáv. fjármálaráðherra, Lagarde vel söguna. Hún gegndi þá formennsku í hópi fjármálaráðherra ESB-ríkjanna.

Bernard Tapie á að baki ævintýranlegan feril í viðskiptum og stjórnmálum og hefur löngum verið meðal þeirra sem setja mestan svip á fréttir franskra fjölmiðla. Hann var um tíma eigandi knattspyrnufélagsins Marseille, forstjóri Adidas og ráðherra þéttbýlismála í vinstristjórn Francois Mitterrand. Hann sat sjö mánuði í fangelsi fyrir að semja um úrslit í kappleik, hefur verið sakfelldur fyrir skattsvik en hefur náð því að komast að nýju í sviðsljósið sem leikari, söngvari, stjórnandi spjallþátta og stuðningsmaður Nicolas Sarkozys.

Tapie hélt því fram að Credit Lyonnais-bankinn hefði svindlað á sér árið 1993 í tengslum við söluna á Adidas. Credit Lyonnais var í eigu ríkisins, bankanum var lokað og skuldbindingar hans féllu undir aðila á vegum ríkisins.

Lagarde hóf afskipti af deilum Tapies við franska ríkið árið 2007 og batt enda á málaferli með því að fela gerðardómi að fjalla um málið. Hann komst að þeirri niðurstöðu árið 2008 að Tapie skyldu greiddar 285 milljónir evra, um 5,4 milljarðar króna, í skaðabætur. Stjórnarandstöðuþingmenn gagnrýndu niðurstöðuna og töldu hana hneyksli. Lagarde reyndi að slá á gagnrýnina með því að segja að eftir skatta og uppgjör skulda fengi Tapie ekki meira en 30 milljónir evra, 560 milljónir kóna, í sinn hlut. Síðar hefur komið í ljós að fjárhæðin er nær 200 milljónum evra, um fjórir milljarðar króna.

Sósíalistar sökuðu Lagarde um að hafa haldið rangt á málum með afskiptum sínum og kröfðust alhliða rannsóknar. Jean-Louis Nadal saksóknari hefur nú gefið fyrirmæli um lögreglurannsókn á hlut Lagarde. Hann segir að ýmislegt veki grunsemdir um ranga málsmeðferð við lausn deilunnar við Tapie sem gæti jafngilt „valdníðslu“. Hann telur að ekki hefði átt að leysa málið sem einkamál þar sem um opinbera fjármuni hafi verið um að ræða.

Christine Lagarde telur að vegið sé að mannorði sínu að ósekju. Hún sagði við Le Figaro í París: „Þetta er tilraun til að sverta orspor mitt.“ Sósíalistar reyndu að strika yfir þá staðreynd að Tapie-málið ætti rætur í Mitterrand-tímanum þegar þeir voru viö völd. Hún sagði: „Ég hef ávallt gætt aðhalds og gegnsæis með eitt að leiðarljósi: almannahagsmuni.“ Málið raskaði ekki ró sinni frekar en annað sem við væri að fást. Hún ætti „óskoraðan“ stuðning ríkisstjórnarinnar.