Damanaki leitar eftir stuðningi við nýja sjávar­útvegs­stefnu ESB

Maria Damanaki, sjávarútvegsstjóri ESB, leitar nú eftir stuðningi við tillögur sínar að breytingum á sjávarútvegsstefnu ESB en miðað er við að hún kynni þær hinn 13. júlí næstkomandi. Að því er stefnt að ný sjávarútvegsstefna ESB komi til framkvæmda á árinu 2013.

Maria Damanaki

Í fyrstu viku júní kynnti Damanaki hugmyndir sínar um nýja stefnu á GLOBE World Oceana Day Forum í London. Við það tækifæri sagði Chris Davis ESB-þingmaður að enginn skyldi lifa í þeirri blekkingu að tillögur Damanaki „rynnu í gegn“ og að allir í Brussel styddu hugmyndir um sjálfbæra nýtingu fiskistofna.

Davis taldi að þriðjungur ESB-þingmanna mundi styðja allt sem framkvæmdastjórn ESB vildi, álika margir skildu ekki hvað felst í tillögunum og loks hefði þriðjungur ESB-þingmanna alls engan áhuga á sjávarútvegsmálm. Þess vegna væri ekki unnt að slá neinu föstu um hvað kynni að gerast.

Í frétt af þessum fundi í London á vefsíðunni SeafoodSource segir að Damanaki sé ekki óvön því að lúta í lægra haldi. Á árinu 2010 hafi hún hvorki náð fram fram áformum um að minnka túnviskveiðar né um niðurrskurð veiða á Eystrasalti.

Ég hef lært af mistökum mínum og ég er með varatillögur,„ sagði hún í London. “Ég hef sett mér rauð strik sem sýna hvar ég þarf að gefast aðeins eftir, en sé farið yfir rauðu strikinn dreg ég tillögur mínar til baka.„

Á vefsíðunni er spurt hvað gerist ef tillögur Damanaki verði ekki samþykktar. Damanaki sagði ekki erfitt að sjá það fyrir. Efnahagvandi útgerðarinnar mundi enn aukast.Störfum fækkaði ekki aðeins í sjávarútvegi heldur einnig í fiskvinnslu, flutningum, höfnum og hjá uppboðshöldurum og smásölum.

„Við getum ekki hreykt okkur af núverandi sjávarútvegsstefnu okkar. Bandaríkjamenn, Ástralar, Ný-Sjálendingar og Normennr standa okkur þegar framar við að innleiða nútímalega. sjálfbæra stefnu sem ber góðan árangur bæði fyrir fiskiðnaðinn og fiskinn í sjónum. Hvað sem því líður er Evrópa enn stórveldi í sjávarútvegi, við flytjum einnig inn 42% af öllum fiski á alþjóðamarki. Við höfum einfaldlega ekki efni á að dragast svo mjög aftur úr að því er sjálfbærni varðar,“ sagði Damanaki.

Samhliða því sem ESB ætlar að draga úr brottkasti með því að taka upp framseljanlega kvóta hafa breytingartillögur á sjávarútvegsstefnunni einnig í för með sér að stefnt er að mestum sjálfbærum afrakstri á hafsvæðum ESB árið 2015. Þetta var ákveðið á heimsráðstefnu um sjálfbærra þróun í Jóhannesarborg í Suður-Afríku árið 2002 en er nú orðið „að lögbundinni skuldbindingu“ sagði Damanaki.

„Tillögurnar sem ég kynni í sumar verða enn eitt skrefið í sameiginlegri baráttu okkar, Það verða að lokum þing einstakra aðildarríkja, ESB-þingið og sjávarútvegsráðherrar í Evrópu sem þurfa að sanna að þeim standi ekki heldur á sama og þeir geti sýnt það í verki með framsýni sinni. Aðstoðið okkur við að koma þessu í gegn. Með ykkar aðstoð getum við lagað sjávarútvegsstefnuna að kröfum líðandi stundar í umhverfismálum og efnahagsmálum,“ sagði sjávarútvegsstjórinn.