Olli Rehn ávítar gríska stjórnmálamenn - skipar þeim að vinna saman

Framkvæmdastjórn ESB ávítaði stjórnmálamenn Grikklands fimmtudaginn 16. júní vegna þess að stjórn og stjórnarandstöðu hefði mistekist að mynda þjóðstjórn í viðræðum daginn áður.

„Mikil ábyrgð hvílir á herðum grískra stjórnvalda og allra forystumanna í grískum stjórnmálum,“ sagði Olli Rehn, efnahagsmálastjóri ESB, í yfirlýsingu. „Við væntum þess að gríska þingið styðji áætlun um efnahagsmál fyrir lok júní eins og um hefur verið samið.“

Olli Rehn

Þríeyki ESB, Alþjóðagjaldeyrissjóðsins (AGS) og Seðlabanka Evrópi (SE) hefur þrýst á ríkisstjórnina, sem nýtur lítils meirihluta, að vinna að samstarfi við íhaldsmenn, sem eru í stjórnarandstöðu, til að Grikkir fái 12 milljarða evru greiðslu frá þessum stofnunum í júlí.

„Ástæða er til að harma að tilraunir til að mynda þjóðstjórn mistókust í gær,“ segir ennfremur í yfirlýsingu Rehns auk þess sem hann áréttar að allir flokkar verði að styðja samkomulag um neyðarlán. Þá segir:

„Staðreynd er að það er á ábyrgð allra flokka að standa að aðgerðum sem koma í veg fyrir greiðsluþrot sem yrði hörmulegt fyrir Grikkland.

Næstu dagar skipta sköpum um það hvort unnt er að koma á fjármálalegum stöðugleika og efnahagsumbótum í Grikklandi og Evrópu. Ég treysti því að allir leiðtogar í Grikklandi og Evrópu átti sig á ábyrgð sinni og hagi sér í samræmi við hana.“

Miðvikudaginn 15. júní slitnaði upp úr viðræðum George Papandreous forsætisráðherra og Antonis Samaras, leiðtoga grísku stjórnarandstöðunnar. Papandreou bauðst til að segja af sér embætti og sagðist nú reyna í fjórða sinn að mynda samsteypustjórn. Papandreou hafnaði hins vegar kröfu Samaras um að samkomulaginu við þríeykið yrði breytt.

Ávítur Rehns því þegar mikil stjórnmálaóvissa ríkir í Aþenu. Tveir áhrifamiklir þingmenn í flokki Papandreous sögðu sig úr þingflokki hans þegar hann tilkynnti uppstokkun á stjórn sinni. Veikir það enn getu hans til að framkvæma nauðsynlegar efnahagsumbætur, sölu ríkiseigna og niðurskurð.

Yiorgos Floridis, sem rætt hafði verið um sem næsta fjármálaráðherra í stað George Papaconstanious, var annar þeirra sem sagði sig úr þingflokknum. Fimm þingsæta meirihluti ríkisstjórnarinnar breytist þó ekki við afsögnina því að þingmennirnir tveir hurfu af þingi og varamenn koma í þeirra stað.

Talið er að Papandreou muni kalla á reynda embættismenn til setu í ríkisstjórn sinni til að draga úr flokkssvipnum á henni. Fái hann traustsyfirlýsingu þingsins sunnudaginn 19. júní og komi efnahagstillögum sínum í gegn er talið líklegt að hann rjúfi þing og gengið verði til kosninga.

Heimild: EUobserver