Baldur spyr Össur á þingi um sjö IPA-styrkumsóknir vegna aðildar að ESB

Baldur Þórhallsson, Jean Monnet-prófessor við Háskóla Íslands, sat nokkra daga á alþingi skömmu fyrir þinglok sem varamaður Marðar Árnasonar, þingmanns Samfylkingarinnar. Baldur lagði meðal annars fyrirspurn fyrir samflokksmann sinn, Össur Skarphéðinsson utanríkisráðherra, um það hvað liði „samþykkt IPA-landsáætlunar fyrir 2011 vegna undirbúnings hugsanlegrar aðildar Íslands að Evrópusambandinu.“

Baldur Þórhallsson

Í svari Össurar kemur fram að undirbúningur verkefna sem til greina kæmi að styrkt yrðu á fyrstu landsáætlun IPA 2011 hafi staðið yfir um hríð. Honum lauk formlega 3. júní sl. þegar stjórnvöld sendu framkvæmdastjórn Evrópusambandsins tillögu sína. Að samanlögðu námu óskir um fjármögnun verkefna sem skoðuð voru mun hærri fjárhæð en hægt var að mæta. Framkvæmdastjórnin kom til móts við það með því að hækka heildarfjárhæð sem ætluð er til IPA-landsáætlana fyrir Ísland úr 28 milljónum evra í 30 milljónir.

Utanríkisráðherra áréttar í svari sínu að öll verkefnin séu valin með tilliti til þess að þau nýtist óháð aðild að Evrópusambandinu. Þessi fyrirvari ráðherrans á rætur að rekja til þess að innan ríkisstjórnarinnar hefur verið ágreiningur um hvort sækja eigi um styrki af þessu ragi, því að þeir séu til marks um aðlögun að kröfum ESB án þess að fyrir liggi ákvörðun um aðild. Hún verði ekki tekin fyrr en að lokinni þjóðaratkvæðagreiðslu. Til að komast fram hjá þessum ágreiningi var ákveðið á vettvangi ríkisstjórnarinnar að umsóknir um IPA-styrki yrðu í höndum utanríkisráðherra og embættismanna hans.

Stjórnarnefnd IPA í Brussel tekur í nóvember næstkomandi afstöðu til umsóknanna frá Íslandi. Þær eru:

• Hagstofan verði styrkt til að endurbæta gerð þjóðhagsreikninga en skortur á mikilvægum hagtölum á ýmsum sviðum veldur erfiðleikum við að meta stöðu einstakra atvinnugreina.
• Matís fái styrk til að framfylgja reglugerðum um matvælaöryggi sem hafa nú þegar verið innleiddar á Íslandi sem hluti af skuldbindingum í gegnum EES.
• Náttúrufræðistofnun fái styrk til að kortleggja vistkerfi og fuglalíf á Íslandi með það fyrir augum að auðkenna þau svæði sem þarfnast verndunar.
• Þýðingamiðstöð fái styrk til að standa að þýðingu á regluverki Evrópusambandsins á íslensku. Hluta af stuðningnum er ætlað að styrkja tækjakaup við nýja námsbraut fyrir ráðstefnutúlka við HÍ.
• Skrifstofa landstengiliðs verði styrkt en hún annast samræmingu og miðlun styrkja til að byggja upp frekari þekkingu á stuðningi Evrópusambandsins á sviði byggðamála og atvinnuuppbyggingar.
• Fræðslumiðstöð atvinnulífsins fái styrk til að efla starfshæfni fullorðinna með litla formlega menntun með því að þróa raunfærnimat.
• Háskólafélag Suðurlands fái styrk til að vinna að verkefninu Katla Jarðvangur. Verkefnið felur m.a. í sér þróunaráætlun fyrir Eyjafjallajökulssvæðið og uppbyggingu á þekkingarsetri um svæðið.