Innan ESB greiða neytendur tvisvar sinnum fyrir fisk, í verslun og með sköttum

Framkvæmdastjórn ESB viðurkennir að fiskneytendur innan ESB borgi tvisvar sinnum fyrir fiskinn sinn vegna rangrar sjávarútvegsstefnu. Milljörðum evra sé sóað með röngum niðurgreiðslum og styrkjum, sem hafi verið ætlað að skapa jafnvægi milli fjölda fiskiskipa innan ESB og stærðar fiskstofna.

Í danska blaðinu Jyllands-Posten segir 30. júní að Maria Damanaki, sjávarútvegsmálastjóri ESB, viðurkenni þessa staðreynd, hún vilji hætta að styrkja úreldingu fiskiskipa og geri tillögu um afnám úreldingarstyrkja við endurskoðun sjávarútvegsstefnu ESB fyrir árið 2013.

„Hingað til höfum við notað skattfé almennings til að stuðla að úreldingu skipa en fækkun þeirra hefur verið alltof lítil,“ segir hún.

Samkvæmt fjárlögum ESB er 6,4 milljörðum evra (106 milljörðum ISK) varið til stuðnings við sjávarútveg innan sambandsins á árunum 2007 til 2013. Stuðningurinn er þó miklu meiri meðal annars vegna þess að einstök ríki leggja einnig fram fé til að styrkja útgerð og sjávarbyggðir.

Í svonefndri grænbók um sjávarútvegsstefnu ESB sem framkvæmdastjórnin sendi frá sér er viðurkennt að þegar árið 2009 hafi opinber útgjöld til sjávarútvegsmála í einstökum löndum numið hærri fjárhæð en andvirði þess fisks sem var landað í höfnum landanna.

„Á einföldu máli þýðir þetta að Evrópumenn greiða næstum tvisvar fyrir þann fisk sem þeir neyta: einu sinni í fiskbúðinni og öðru sinni til skattayfirvalda,“ segir í hinni opinberu grænbók.

Í Jyllands-Posten segir að í nýrri skýrslu komi fram að mörg undanfarin ár hafi fiskiskipum fækkað um 2 til 3% á ári. Á sama tíma hafi ESB veitt styrki til nýsmíði og endurnýjunar á skipum og því sé ljóst að í stað þeirra skipa sem hafa verið úrelt hafi komið ný eða endurnýjuð öflugri skip.

Vegna þessarar þróunar hefur sókn í sífellt veikbyggðari fiskstofna aukist og tekjur útgerða og sjómanna lækkað. Úti á miðunum neyðist menn síðan til að kasta smáfiski í von um að fá stærri og verðmeiri fisk til löndunar. Víða er ástandið þannig að mati ESB að afkastageta fiskiskipaflotans er tvöfalt eða jafnvel þrefalt meiri en fiskstofnar þola.

Jyllands-Posten leitar álits Jespers Raakjærs, prófessors við Álaborgar-háskóla sem hvetur til þess að hætt sé öllum beinum styrkjum til útgerða og sjómanna: „Í hvert skipti sem veittur er styrkur gefur skip meira af sér og öll reynsla sýnir að hagnaðurinn er nýttur til að stækka skipið eða bæta veiðibúnað þess,“ segir hann.