Opinberir starfsmenn á námskeiðum í HÍ til undirbúnings ESB-aðild

Baldur Þórhallsson, Jean Monnet prófessor í stjórnmálafræði við Háskóla Íslands og varaþingmaður Samfylkingarinnar, heldur um þessar mundir fyrirlestra og námskeið fyrir hinar ýmsu opinberu starfsgreinar til „að efla þekkingu starfsfólks stjórnsýslunnar og opinberra stofnana á samvinnu ríkja Evrópu og Evrópusambandinu“, eins og segir í kynnisbréfi sem Ásta Möller MPA, forstöðumaður Stofnunar stjórnsýslufræða og stjórnmála HÍ, sendi nýlega í fjöldapósti.

Í dreifibréfinu segir: „Að námskeiði loknu eiga þátttakendur að hafa góða þekkingu á sögu, stofnunum og ákvarðanatöku sambandsins. Einnig verður farið yfir fyrirhugaðar breytingar á starfsemi Evrópusambandsins með Lissabon sáttmálanum og framtíð sambandsins.

Baldur er kynntur til sögunnar sem „einn helsti sérfræðingur landsins um sögu, stofnanauppbyggingu og ákvarðanatöku innan Evrópusambandsins“ en þess er látið ógetið að hann sé jafnframt einn ötulasti baráttumaður fyrir aðild Íslands að ESB.

Samkvæmt dreifibréfinu eru það Félag forstöðumanna ríkisstofnana í samvinnu við Stofnun stjórnsýslufræða og stjórnmála HÍ og Alþjóðamálastofnun HÍ sem býður upp á þetta námskeið „fyrir stjórnendur og starfsfólk stjórnsýslunnar og opinberra stofnana (einnig ætlað starfsfólki sveitarfélaga)“. Þátttökugjald er 13. 500 kr. en námskeiðið tekur fjórar klukkustundir frá 13.00 til 17.00.

Tekið er fram að Baldur hafi haldið sambærilegt námskeið fyrir starfsmenn nokkurra opinberra stofnana og fyrirtækja og fengið eindóma lof fyrir námskeiðið. Kennsla fari fram í fyrirlestrum og umræðum. Kennsluefni sé dreift á námskeiðinu, en einnig verði bókakaflar og greinar aðgengilegar á rafrænu formi.