Le Monde veltir fyrir sér hvort Bretar eigi rétt til aðildar að innri markaði ESB

Í leiðara franska blaðsins Le Monde um niðurstöðu leiðtogafundar ESB-ríkjanna 8. og 9. desember segir að þar hafi verið teknar „sögulegar“ ákvarðanir sem dugi þó því miður ekki til að slökkva þá elda sem skuldakreppan hafi kveikt innan ESB.

Blaðið segir að Evrópusambandið geti ekki þolað að innan vébanda sinna séu þeir sem reyni að ná öllu fram sem þeir vilja án þess að borga fyrir það og virða agareglur. Bretar hafi aldrei viljað evruna né haft trú á henni. Þeir hafi skipað sér til hliðar við sambandið að þessu leyti. Þetta sé þeirra val. Á hinn bóginn megi velta fyrir sér lögmæti þess að þeir eigi aðgang að innri markaðnum, eigi fulltrúa í framkvæmdastjórn ESB og öðrum stofnunum sambandsins. Þetta sé nauðsynlegt að ræða í framhaldi af því sem gerðist á fundi leiðtoga ESB.

Blaðið bendir á að leiðtogafundurinn hafi staðfest forystuhlutverk Frakka og Þjóðverja við að þróa samstarf Evrópuríkja. Nú verði gerður samningur milli ríkisstjórna 26 ríkja í þeim anda sem Angela Merkel og Nicolas Sarkozy hefðu kynnt eftir fund sinn í París 5. desember. Nú 20 árum eftir að Maastricht-sáttmálinn hafi verið gerður hafi loks tekist að koma því um kring, sem ekki tókst þá að leggja drög að, ríkisfjármálasamningi innan vébanda myntsáttmálans. Um sé að ræða óhjákvæmilegt en meiriháttar fullveldisframsal sem örugglega muni sæta mikilli andstöðu hér og þar.

Blaðið bendir á að þetta sé sextándi leiðtogafundurinn helgaður evrunni síðan vandræðin hófust á árinu 2009. Hið sama eigi við eftir hann eins og hina fimmtán fyrri fundi að enginn viti hvernig niðurstöðu hans verði tekið á fjármálamörkuðum.