Össur Skarphéðinsson: Evran er betri gulrót fyrir ESB-aðild nú en 2009 - aðildarsamningi ekki lokið fyrir kosningar 2013

Jón Bjarnason og Össur Skarphéðinsson ræða saman þingsalnum.

Össur Skarphéðinsson utanríkisráðherra áréttaði þá skoðun sína í Kastljósi miðvikudaginn 21. desember að evru-vandinn skapaði „sóknartækifæri fyrir Ísland“ í viðræðunum við Evrópusambandið. Nú væri evran „betri á bragðið en þegar við lögðum af stað“ og þar með betri gulrót til að lokka þjóðina inn í Evrópusambandið. Samningar mundu þó ekki hafa náðst fyrir kosningar í apríl 2013.

Össur taldi að leiðtogar Evrópusambandsins hefðu 8. og 9. desember tekið „einbeitta ákvörðun“ um að grípa til allra ráða til að koma evrunni í „þokkalegt horf“. Það væri ljóst að Grikkir hefðu „svindlað“ og nú ætti að útiloka að það gerðist að nýju.

Össur gerði lítið úr spurningu Þóru Arnórsdóttur í Kastljósi um að helmingur ríkisstjórnarinnar væri andvígur aðild að ESB; VG hefði staðið að aðildarumsókninni, ríkisstjórnin hefði öll lagt hana fyrir alþingi og samningar hefðu gengið betur en ætlað var í upphafi.

Samstarf sitt við Jón Bjarnason, sjávarútvegs- og landbúnaðarráðherra, væri gott. Jón liti yfir öxlina á sér og þar með gæfi Jón Bjarnason viðræðunum trúverðugleika. Hann lifði góðu lífi með Jóni í ríkisstjórninni.

Utanríkisráðherra sagðist líta þannig á að meirihluti þjóðarinnar vildi halda viðræðunum áfram og sjá niðurstöðu þeirra til að segja álit sitt á henni. Á annan hátt væri ekki unnt að túlka afstöðu Sjálfstæðisflokksins, sá sem ekki vildi slíta viðræðunum hlyti að vilja halda þeim áfram.

Þóra Arnórsdóttir spurði hvers vegna menn ræddu ekki erfiðustu málin milli Íslands og ESB, landbúnaðarmál og sjávarútvegsmál, í stað þess að opna og loka köflum um þau mál sem ekki vektu ágreining. Össur sagði að hann hefði viljað opna kaflana um sjávarútveg og landbúnað snemma, þingið hefði viljað það og einnig fulltrúar ESB en það hefði ekki tekist af ýmsum ástæðum sem hann lýsti ekki nánar en lét þess þó getið að endurskoðun sjávarútvegsstefnu ESB hefði seinkað.

Í máli Össurar kom fram að hann teldi ekki framkvæmanlegt að ljúka gerð aðildarsamnings við ESB fyrir kosningar í apríl 2013. Hann sagði Jóhönnu Sigurðardóttur hafa lagt áherslu á að aðildarviðræðum lyki fyrir þann tíma, það væri munur á því og ganga frá samningi. Í nýlegri heimsókn sinni til Brussel hefði hann heyrt fulltrúa Dana sem færu með formennsku í ESB fyrri hluta árs 2012 lýsa yfir áhuga á að opna kaflana um sjávarútveg og landbúnað „sem fyrst“.