Steingrímur J. segist hafa gengið lengra til móts við ESB-aðild en hann lofaði fyrir kosningar 2009

Steingrímur J. Sigfússon og Jóhanna Sigurðardóttir.

„Þetta hefur vissulega verið mjög erfið vegferð. Ég dreg ekkert úr því. Það hefur reynt mjög á okkur og við neyddumst til að ganga lengra í málamiðlun á þessu sviði en ég hafði reiknað með, það viðurkenni ég fúslega,“ segir Steingrímur J. Sigfússon, sjávarútvegs- og landbúnaðarráðherra, í viðtali við Bændablaðið 19. janúar 2012 þegar hann er spurður hvort hann hafi svikið kosningaloforð með því að sækja um aðild að ESB. Hann segir að í því ljósi beri að skoða loforð hans fyrir kosningarnar 25. apríl 2009. „Ég reiknaði ekki með því að þetta yrði svona hart sótt en það var einfaldlega niðurstaðan að grundvöllurinn fyrir því að af þessari ríkisstjórn gæti orðið var einhvers konar lending í þessu máli á þeim nótum sem varð.“

Steingrímur J. segir sér til afsökunar, að stjórnarmyndunin hafi síðan verið samþykkt af stofnunum Vinstri grænna (VG) og fengið margítrekaðan stuðning síðan. „Hefur áframhaldandi þátttaka í þessari ríkisstjórn verið samþykkt, oft einróma eða með yfirgnæfandi meirihluta atkvæða og forystan hvött til að halda verkinu áfram,“ segir Steingrímur J. Hann telur sig því hafa skýrt og óumdeilt umboð til að standa að málum á þann veg sem hann hafi gert. Þessi ESB-leiðangur sé þeim ekki að skapi.

„Enn sem komið er hef ég ekki talið það skynsamlegt að við hverfum frá því ferli sem við erum stödd í núna,“ segir Steingrímur J. og vill fá efnislega niðurstöðu í viðræðunum við ESB. „Slíka niðurstöðu fengjum við ekki með því að hætta núna,“ að hans sögn. Hana mætti fá með því að slíta viðræðunum vegna ágreinings eða með því leiða þær til lykta með samningi. Enn hafi því miður ekki reynt á þá málaflokka sem mestu máli skipti.

Í samtalinu kemur fram að Steingrímur J. sé enn þeirrar skoðunar að „það þjóni ekki okkar heildarhagsmunum að ganga inn í Evrópusambandið“. Hann hafi frekar styrkst í þeirri afstöðu og líklega fleiri gert „miðað við erfiðleikana hjá sambandinu og ýmislegt sem er að koma í ljós um innri veikleika þess samstarfs“. Þá segist Steingrímur J. standa vörð um krónuna, meiri kostir séu við hana en gallar. Náist samningar milli Íslands og ESB segist Steingrímur J. muni beita sér gegn samþykkt þeirra.

Hann segist ekki vita betur en þeir Jón Bjarnason séu „sammála í grundvallarafstöðunni til Evrópusambandsins“ því skipti ekki máli hvor þeirra sitji í sjávarútvegs- og landbúnaðarráðuneytinu.