Danmörk: Fjöldi bankagjaldþrota er jafnmikill og á Íslandi - óvarlegar lánveitingar ráða úrslitum

Fjöldi bankagjaldþrota í Danmörku hefur þegar skipað landinu í fyrsta sæti með Íslandi þegar litið er til þess sem gerst hefur síðan á árinu 2008.

Verði enn einn danskur banki gjaldþrota nær Danmörk fyrsta sætinu af Íslandi í „keppninni“ um flest gjaldþrot banka á Norðurlöndunum. Með einu bankagjaldþroti í viðbót munu alls 11 bankar hafa farið á hausinn síðan bankakreppan hófst. Þetta kemur fram í úttekt í Ugebrevet A4 sem unnin hefur verið eftir fyrirspurnir til fjármálaeftirlita á Norðurlöndunum.

Amagerbanken er einn hinna dönsku banka sem orðið hefur gjaldþrota.

Sé litið fram hjá bankahruninu á Íslandi eru bankagjaldþrot í Danmörku í hróplegri andstöðu við það sem gerst hefur í Svíþjóð, Noregi og Finnlandi en samtals hefur aðeins einn banki orðið gjaldþrota í löndunum.

Jesper Ragnvid, prófessor við Copenhagen Business School, bendir á hve illa Danir standi að vígi gagnvart nágrönnum sínum á Norðurlöndum þegar litið sé til bankagjaldþrota.

„Oft er sagt að kreppan sé vegna ytri aðstæðna. Við verðum hins vegar jafnframt að játa að danskir bankar þola kreppuna mun verr en bankar í Svíþjóð, Noregi og Finnlandi þótt þeir hafi orðið fyrir sama alþjóðlega höggi. Eigi að benda á eitthvert eitt atriði hlýtur það að vera húsnæðisbólan og gífurleg aukning útlána í tengslum við hana sem einkenndi danska banka fram á árið 2007,“ segir prófessorinn.

Jesper Rangvid segir þó ekki unnt að bera stöðuna í Danmörku saman við það sem gerðist í íslenska bankakerfinu sem hafi orðið tíu sinnum stærra en þjóðaframleiðsla Íslendinga.

Niels Storm Stenbæk, aðalhagfræðingur fjármálaeftirlitsins, viðurkennir að fram að fjármálakreppunni hafi bankarnir gengið of langt í lánveitingum sínum.

„Vilji menn vera vitrir eftirá er auðvelt að benda á að of mikið fé hafi verið lánað – einkum til fyrirtækja sem hefðu ekki átt að fá lán. Það er líklega af því að vextir voru svo lágir og þess vegna var meiri ásókn í fjármögnun frá bönkum en ella hefði verið,“ segir hann.