Tugir þúsundir mótmæltu ACTA á strætum og torgum Evrópu um helgina

Tugir þúsunda mótmælenda létu að sér kveða á götum og torgum víða um Evrópu laugardaginn 11. febrúar gegn alþjóðasamningnum gegn eftirgerð, Anti-Counterfeiting Trade Agreement (ACTA), sem á að sporna við hvers kyns stuldi á hugverkum og höfundarrétti en margir óttast að takamarki frelsi til að hala niður myndir og tónlist án greiðslu og hvetji til opinbers eftirlits í netheimum.

Andstaðan við ACTA er sérstaklega mikil í Austur-Evrópu þar sem ókeypis niðurhal á kvikmyndum og tónlist nýtur vinsælda og mótmælendur telja að í hinum nýju reglum felist afturhvarf til eftirlits í ætt við það sem ríkisstjórnir kommúnista notuðu.

Átta ríki, þar á meðal Japan og Bandaríkin, skrifuðu í október undir samning til að hefta þjófnað að höfundarrétti og vörumerkjum. Undirskriftinni var fagnað sem skrefi í þá átt að ACTA kæmist í framkvæmd. Viðræður um gerð samningsins hafa staðið í nokkur ár. Til þessa hafa aðeins fá ríki ritað undir samninginn eða staðfest hann.

Þýska ríkisstjórnin ákvað föstudaginn 10. febrúar að fresta undirritun af sinni hálfu. Álitsgjafar í þýskum fjölmiðlum sögðu að það hefði verið rangt að vinna að gerð samningsins með leynd og án þess að kynna málið fyrir netverjum. Þeir benda hins vegar jafnframt á nauðsyn þess að vernda höfundarrétt og samningurinn sé ekki eins slæmur og af sé látið.

Í hinu vinstrisinnaða þýska blaði Die Tageszeitung segir mánudaginn 13. febrúar:

„Hin miklu mótmæli um helgina eru sterkt merki fá net-kynslóðinni sem ekki nýtur nægilegrar pólitískrar viðurkenningar en ver sig af hörku gegn frelsisskerðingu í netheimum. ACTA er ekki eins og hver annar gamall viðskiptasamningur. Með samningnum verður til lagaleg umgjörð til að hefta rétt borgaranna í því skyni að tryggja langtíma hagnað í þágu úrelts einokunariðnaðar rétthafa.

Með stuðningi þessara sam-evrópsku samstöðu ætti Sabine Leutheusser-Schnarrenberger dósmálaráðherra [Þýskalands] að gera alvarlega tilraun til að stöðva ACTA strax. Alþjóðlegar leyniviðræður um arftaka ACTA eru þegar hafnar: Trans-Pacific Partnership (TPP) er einn af ljótum tvíburum sem nú er á undirbúningsstigi milli Bandaríkjanna og níu Kyrrahafsríkja. Drög af TTP sem hefur verið lekið líta út eins og „matseðill“ fyrir rétthafaiðnaðinn. Þar er gengið lengra við að skerða frelsi netnotenda og netþjóna en ætlunin var með ACTA en var hafnað við gerð samningsins. TPP kann að breytast í fordæmi fyrir „ACTA-plús““.