Seðlabanki Evrópu gegn því að gefa eftir bankaskuldir Írlands

Eric Chan

Seðlabanki Evrópu

Seðlabanki Evrópu leggst eindregið gegn því að nokkuð verði gefið eftir af bankaskuldum Írlands. Stjórnvöld á Írlandi tóku ábyrgð á öllum skuldbindingum írskra banka haustið 2008 þegar bankakreppan skall á og þær skuldbindingar eru nú stór hluti af þeim skuldum sem Írar hafa þurft að fá aðstoð frá öðrum evruríkjum til að ráða við. Írska ríkið greiðir nú afborganir af skuldabréfum tveggja írskra banka, Anglo Irish Bank og Irish Nationwide Building Society, sem báðir fóru í þrot. Framundan er í lok marz greiðsla sem nemur 3,1 milljarði evra. Samtals er talið að kostnaður írska ríkisins með vöxtum af þessum skuldbindingum nemi um 47 milljörðum evra fram til 2031 sem er um þriðjungur af vergri landsframleiðslu Írlands. Meðal þeirra, sem eiga þau skuldabréf írskra banka, sem írska ríkið greiðir af er Seðlabanki Evrópu sjálfur.

Rök Seðlabanka Evrópu fyrir því að ekki eigi að gefa neitt eftir af þessum skuldum er að Írland hafi svigrúm til að borga. Í því sambandi bendir SE Írum á að lækka laun opinberra starfsmanna og draga úr greiðslum í velferðarkerfinu á þeirri forsendu, að hvoru tveggja sé hærra á Írlandi en í þremur löndum, sem taki þátt í að hjálpa Írum þ.e. á Spáni, Slóveníu og Slóvakíu.

Vaxandi andstaða er meðal almennings á Írlandi við þessar greiðslur. Frá þessu segir Irish Times í dag.