Mannréttindadómstóll Evrópu: Fellst á framsal grunaðra hryðjuverkamanna til Bandaríkjanna - segir ofuröryggi í fangelsum ekki brot á mannréttindum

Mannréttindadómstóll Evrópu kynnti þá niðurstöðu sína þriðjudaginn 10.apríl að bresk stjórnvöld hefðu heimild til að framselja fimm menn grunaða um hryðjuverk frá Bretlandi til Bandaríkjanna. Það fæli ekki í sér brot á mannréttindum þótt mennirnir yrðu dæmdir í ævilanga einangrunarvist í „ofuröruggu“ fangelsi.

ADX Florence ofuröryggisfangelsi í Klettafjöllum Colarado-ríkis.

David Cameron, forsætisráðherra Bretlands, fagnaði mjög ákvörðun dómaranna.

Í frétt BBC um málið segir að dómurinn sé einn hinn mikilvægasti síðan ráðist var á New York og Washington 11. september 2001 því að í honum felst viðurkenning á að kröfum um mannréttindi sé fylgt í helstu öryggisfangelsum Bandaríkjanna og þar með sé auðveldara en ella fyrir Breta að framselja grunaða menn til helstu samstarfsþjóðar sinnar.

Fræðilega má nú áfrýja málinu til yfirdeildar mannréttindadómstólsins, í reynd fara mjög fá mál til þessarar lokadeildar dómstólsins. Þriggja mánaða áfrýjunarfrestur er til yfirdeildarinnar, komi ekki til áfrýjunar verða mennirnir framseldir frá Bretlandi til Bandaríkjanna.

Fjölskylda eins mannanna, Babars Ahmads, sem setið hefur í fangelsi í átta ár án dóms, segir að hún muni berjast gegn framsali. BBC ræddi við hann í síðustu viku og fór hann þess á leit að verða dæmdur í Bretlandi þar sem hann væri sakaður um afbrot þar.

Theresa May, innanríkisráðherra Bretlands, fagnaði niðurstöðu dómaranna í Strassborg og sagðist ætla að vinna hratt að því afhenda Bandaríkjamönnum hina grunuðu.

Mannréttindadómstóllinn sagði að ekki yrði um brot á mannréttindum að ræða ef mennirnir yrðu settir í einangrun í ADX Florence, alríkisofuröryggisfangelsi í Colorado-ríki, sem er notað fyrir þá sem eru fundnir sekir um hryðjuverkabrot. Þá bryti ekki heldur gegn mannréttindum að dæma mennina til lífstíðarvistar í fangelsi. Dómararnir sögðu að aðstæður í ADX Florence væru að sumu leyti betri en í mörgum evrópskum fangelsum.

ADX Florence fangelsið er stundum kallað Alcatraz Klettafjallanna. Sagt er að þar séu 1.400 fjarstýrðar stáldyr, hreyfiskynjarar og byssuturnar. Einangrunarvist einkennir ofuröryggisfangelsi, þar eru fangar einir í klefum sínum í 23 stundir á hverjum sólarhring. Málsvarar þessara fangelsa segja að þau hæfi vel hinum verstu meðal hinna verstu. Gagnrýnendur segja að fangelsin standist ekki mannréttindakröfur og dvöl þar jafngildi pyntingum.

Abu Hamza er sakaður um að hafa átt aðild að gíslatöku í Jemen og tilraun til að koma á fót þjálfunarbúðum fyrir hryðjuverkamenn í Bandaríkjunum. Haroon Aswat er einnig sakaður vegna tengsla við þjálfunarbúðir. Babar Ahmad og Talha Ahsan eru taldir hafa hvatt til hryðjuverka á vefsíðu í London. Þeir eru einnig sagðir hafa tekið þátt í að skipuleggja sprengjuárásir á sendiráð Bandaríkjanna í Austur-Afríku árið 1998.

Fyrr á þessu ári bannaði mannréttindadómstóllinn Bretum að framselja Abu Qatada, róttækan klerk, til Jórdaníu með þeim rökum að þar mundi hann ekki njóta réttlátrar málsmeðferðar fyrir dómi.