Spánn: Bankar tvöfölduðu lántökur hjá SE-skuldatryggingaálag í 500 punkta-verðfall á hluta­bréfum

Seðlabanki Evrópu hefur upplýst, að spænskir bankar tvöfölduðu lántökur sínar hjá Seðlabanka Evrópu í marz frá febrúar og tóku þar 316,3 milljarða evra að láni. Þessi mikla aukning á lántöku þeirra hjá SE hefur sannfært miðlara um að spænsku bankarnir hafi ekki lengur aðgang að alþjóðlegum fjármálamörkuðum. Afleiðingin er sú, að þeir seldu spænsk hlutabréf í stórum stíl í gær, sem aftur leiddi til verðlækkunar á öðrum hlutabréfum. Markaðir um alla Evrópu féllu í gær, París lækkaði um 2,5%, Frankfurt um 2,4% og London um 1%.

Ávöxtunarkrafan á 10 ára spænsk skuldabréf fór yfir 6% að sögn Daily Telegraph í morgun, sem eru talin mörk þess, sem ríki geti staðið undir í kostnaði við fjármögnun og skuldatryggingaálag á Spán fór upp í 500 punkta, sem þýðir að það kostar 500 þúsund pund að tryggja 10 milljón punda spænsk ríkisskuldabréf. Til samanburðar kostar 70 þúsund pund að tryggja sambærilegt þýzkt ríkiskuldabréf.

Wall Street Jorunal segir að nú sé komið í ljós að um 28% af þeirri trilljón evra, sem Seðlabanki Evrópu lánaði út í desember og janúar til banka í evruríkjum til þriggja ára á 1% vöxtum hafi farið til spænskra banka. Þeir hafi notað peningana annars vegar til að endurfjármagna sig og hins vegar til að kaupa 40,6 milljarða evra í spænskum ríkisskuldabréfum, em sé helmingur af fjármögnunarþörf spænska ríkisins á þessu ári. Maria Fekter, fjármálaráðherra Austurríkis hefur notað það sem röksemd fyrir því að staða Spánar sé ekki jafn slæm og af er látið, að spænska ríkið hafi þegar tryggt sér helming af því lánsfé, sem það þurfi á þessu ári.

Spænska dagblaðið El País segir í morgun að IBEX35 hlutabréfavísitalan hafi lækkað um 15,3% á þessu ári.