Evran og ESB verða átakamál í komandi kosningum í Hollandi - skortur á aðhaldi í ríkisfjármálum stjórninni að falli

Mark Rutte, forsætisráðherra Hollands, gengur á fund Beatrix Hollandsdrottningar í dag og biðst lausnar fyrir sig og ráðuneyti sitt þar sem sér hafi mistekist að tryggja nægan þingmeirihluta til að verða við kröfum Evrópusambandsins um að skera niður ríkisútgjöld og tryggja að halli á ríkissjóði verði innan við 3% af vergri landsframleiðslu.

Tveir flokkar hafa staðið að hollensku ríkisstjórninni, Frjálslyndi flokkurinn (VVD) undir forystu forsætisráðherrans og Kristilegir demókratar (CDA). Flokkarnir tveir hafa ekki meirihluta á þingi og hafa því notið stuðnings frá Frelsisflokki sem einnig er kenndur við stofnanda sinni Geert Wilders. Hann leggst eindregið gegn því að orðið verði við kröfu ESB og neitar að styðja frekari niðurskurð ríkisútgjalda.

Stjórnarflokkarnir hófu trúnaðarviðræður sín á milli með Frelsisflokknum hinn 5. mars um leiðir til sparnaðar í rekstri hollenska ríkisins. Nýlega var lögð fram opinber spá um að hallinn á ríkissjóði Hollands árið 2013 yrði 4,7% ef ekkert yrði að gert.

Geert Wilders segist ekki geta stutt ríkisstjórnina við aðför hennar að hag almennings, hann vilji ekki láta fólki blæða „undan hrammi skriffinna í Brussel“.

Hollenska þingið verður nú rofið og boðað til kosninga. Wilders segir að þær muni snúast um ESB og evruna. Haldi Wilders styrk sínum eða auki fylgi sitt er talið að hollenska þinginu reynist erfitt að samþykkja aðild Hollendinga að ríkisfjármálasamningi ESB eða framlag þeirra til björgunarsjóðs evrunnar.

Hollensk stjórnvöld hafa skipað sér í raðir þeirra á evru-svæðinu sem mest hafa gagnrýnt losaralega fjármálastjórn ríkja í Suður-Evrópu. Fall stjórnarinnar nú vegna skorts á aðhaldi í ríkisfjármálum sýnir á hinn bóginn að í þeim efnum veit enginn ævi sína fyrr en öll er. Holland er eitt fárra evru-ríkja sem enn nýtur AAA einkunnar hjá matsfyrirtækjum. Vandræðin nú kunna að stefna einkuninni í hættu.