Merkel og Hollande stilla saman strengi á blaðamannafundi í Berlín - eru fús að leggja Grikkjum frekara lið ef þeir óska

François Hollande Frakklandsforseti og Angela Merkel Þýskalandskanslari lögðu áherslu á að þau vildu að Grikkir yrðu áfram í evru-hópnum á sameiginlegum blaðamannafundi að kvöldi þriðjudags 15. maí í Berlín. Hollande hélt til Berlínar síðdegis eftir embættistöku sína í París. Hann komst til fyrsta fundar síns með Merkel í annarri atrennu en snúa varð flugvél hans til baka eftir flugtak í París þar sem hún varð fyrir eldingu.

François Hollande og Angela Merkel á fyrsta sameiginlega blaðamannafundi sínum í Berlín 15. maí 2012.

Kanslarinn sagði ríkisstjórnir landanna tveggja ætla að „kanna hvort leggja mætti meira til vaxtar“ í Grikklandi ef stjórnvöld í Aþenu færu fram á slíkt. Nokkru áður en Hollande og Merkel hittust slitnaði upp úr tilraunum til stjórnarmyndunar í Grikklandi og verður efnt til þingkosninga þar að nýju í júní.

Innan ESB og meðal stjórnmálaskýrenda telja ýmsir að fyrir þingkosningarnar í Grikklandi muni flokkarnir sem vilja standa við samkomulagið við ESB og Alþjóðagjaldeyrissjóðinn (IGS) leggja hart að forystumönnum innan ESB og óska eftir aðstoð frá þeim og stuðningi sem kynni að auka fylgi flokkanna sem fengu sameiginlega aðeins 40% fylgi í kosningunum 6. maí.

Merkel og Hollande lögðu sig fram um að árétta samstöðu sína um mikilvæg mál á blaðamannafundinum í Berlín. „Okkur er ljós ábyrgð Frakka og Þjóðverja á farsælli framvindu mála í Evrópu og ég tel að í þeim anda muni okkur takast að finna lausn á einstökum málum.“ sagði Merkel. Ágreiningur þeirra væri ekki eins djúpstæður og ætla mætti af fréttum.

Hollande sagði að hann hefði í hyggju að „leggja öll mál á borðið“ á óformlegum fundi leiðtoga ESB-ríkjanna miðvikudaginn 23. maí í Brussel, þar á með tillögu um evru-skuldabréf sem mælast illa fyrir hjá Þjóðverjum. Hann áréttaði einnig að hann vildi semja að nýju um ákvæði í ríkisfjármálasamningnum sem var og er sérstakt áhugamál Merkel og hún vill að standi óbreyttur.

Hollande minnti á að samskipti Frakka og Þjóðverja hefðu verið góð í áranna rás þótt leiðtogar ríkisstjórna landanna væru ekki sammála um meginstefnur í stjórnmálum. Þetta hefði gilt um François Mitterrand og Helmut Kohl, og Gerhard Schröder og Jacques Chirac. Nú skipti miklu að samskiptin yrðu á þann veg að þau kæmu í veg fyrir að evru-samstarfið gliðnaði í sundur.