Danir endurnýja þátttöku sína í smíði fjarstýrða flugvéla - vekja fögnuð í Washington

Danir hafa ákveðið að breyta um stefnu og taka þátt í sameiginlegu NATO-verkefni sem snýst um að festa fé í þróun og smíði fimm fjarstýrðra flugvéla (drones á ensku). Í danska blaðinu Politiken segir mánudaginn 21. maí að Barack Obama hafi hvatt Helle Thorning-Schmidt, forsætisráðherra Danmerkur, til að endurskoða fyrri ákvörðun um að standa ekki að verkefninu.

Nick Hækkerup

Danir höfðu lýst aðild að verkefninu við upphaf þess en hættu henni árið 2010 vegna sparnaðar í ríkisrekstri. Fyrr á þessu ári hitti danski forsætisráðherrann Obama í Hvíta húsinu og ræddi forsetinn málið þar að sögn Politiken.

Fyrir nokkrum dögum sneru fulltrúar dönsku stjórnmálaflokkanna sem standa að samkomulagi um útgjöld til varnarmála í danska þinginu við blaðinu og samþykktu að nýju aðild Dana að hinu svonefnda AGS-verkefni.

Nick Hækkerup, varnarmálaráðherra Dana, vill ekki staðfesta framvindu málsins í samtali við Politiken en segir:

„Bandaríkjastjórn lítur á Danmörku sem kjarnaríki í NATO og vill gjarnan að við séum þátttakendur í því sem hún telur meginviðfangsefni bandalagsins. Þetta á til dæmis við um AGS-verkefnið. Ákvörðun okkar um að hefja að nýju þátttöku í verkefninu hefur greinilega vakið ánægju í Washington.“

Danska ríkisstjórnin hefur einnig lagt fram krafta sína við söfnun fjár til að standa undir kostnaði við afganskar öryggissveitir eftir árið 2014. Hefur stjórnin lofað 100 milljónum danskra króna sérstaklega í þessu skyni og þar með sýnt frumkvæði við hlið fáeinna annarra ríkisstjórna.

Nick Hækkerup bendir að það falli vel að þjóðarhagsmunum Dana að leggja mikið af mörkum til NATO:

„Fyrir litla þjóð eins og Dani skiptir gífurlega miklu máli að alþjóðlegar ákvarðanir séu teknar á vettvangi eins og NATO þar sem það eru ekki aðeins hinir stóru og sterku sem ráða. Þess vegna eigum við einnig að leggja okkar af mörkum,“ segir hann við Politiken.