Váfugl Halls kemur út á ensku -andstaða við ESB magnast í Bretlandi - ESB líkt við heimsveldi heimskunnar

Vulture‘s Lair, bók Halls Hallssonar, fyrrverandi fréttamanns og blaðamanns á Morgunblaðinu, var í vikunni kynnt í Westminster-höll, hjarta breska heimsveldsins og húsakynnum breska þingsins. Bókin er þýðing á Váfugli sem kom út fyrir nokkrum árum. Fjölmenni var við útgáfuna, þar á meðal þingmenn og lávarðar segir í fréttatilkynningu sem Evrópuvaktinni hefur borist.

Bjarni Benediktsson, formaður Sjálfstæðisflokksins, fór sérstaklega utan til að raka þátt í útgáfufundinum en ásamt honum fluttu ræður íhaldsþingmaðurinn Bill Cash frá Stone og verkamannaflokksþingmaðurinn Austin Mitchell frá Grimsby. Báðir eru það sem Bretar kalla „Eurosceptics“ eða efasemdarmenn um aðildina að ESB. Þeir ráðlögðu báðir Íslendingum eindregið að fara ekki inn í Evrópusambandið. Rithöfundurinn Hallur Hallsson flutti ræðu um baksvið Váfuglsins og frumsýnt var myndband sem tengist enskri útgáfu bókarinnar.

Þær raddir verða nú háværari í báðum stóru bresku stjórnmálaflokkunum sem krefjast þess að Bretar fái að segja hug sinn til aðildar að ESB í þjóðaratkvæðagreiðslu.

Sunnudaginn 20. maí skrifaði álitsgjafinn Peter Hitchens á Mailonline, vinsælustu vefréttasíður Bretlands, pistil undir fyrirsögninni: Hvers vegna var heimsveldi hins illa sigrað og síðan farið í faðminn á heimsveldi heimskunnar?

Hún hefst á þessum orðum:

„Evrópusambandið er eins og sjúkrahús þar sem allir læknarnir eru geðveikir. Sama hvað er að, lækningin er alltaf hin saman – meiri samruni – og hún er alltaf röng. Besta sem menn gera er að fara aldrei þangað inn.

Fari maður inn er best að fara út aftur. Komist maður ekki út, deyr maður líklega.

Þeir okkar sem velta fyrir sér sögunni, stjórnmálum og sannleikanum hafa vitað þetta í mörg ár.

Nú þegar „sérfræðingar“ og „teknókratar“ ESB vinna þá óhæfu að eyðileggja efnahag Grikkja, Spánverja og Ítala hljóta allir að sjá þetta.

Í stað þess að bjóða bjarta framtíð býður ESB ekkert annað en gjaldþrot og hnignun.

Hafi Sovétríkin verið heimsveldi hins illa – sem þau voru – er ESB heimsveldi heimskunnar. Heltekið þeirri skoðun að þjóðríkið heyri til sögunni herðir ESB nýlendur sínar í fjötra á sama tíma og látið er eins og þær njóti sjálfstæðis.“

Á Mailonline segir einnig að í Bretlandi sé það fyrsta verk nýs forsætisráðherra að fara í Buckingham-höll og kyssa á hring drottningar. Í Frakklandi sé það hins vegar fyrsta verk nýs forseta að fara til Berlínar og kyssa á hring Þýskalandskanslara.