Fjármála­ráðherrar Þýskalands og Frakklands segjast ætla að bjarga evrunni með Grikki innanborðs

Fjármálaráðherrar Þýskalands og Frakklands hafa áréttað að þeir muni vinna saman að lausn á vanda evru-svæðisins. Ólík viðhorf þeirra til evru-skuldabréfa kunna hins vegar að flækja málið.

Wolfgang Schäuble og Pierre Moscovici

Wolfgang Schäuble, fjármálaráðherra Þýskalands, lagði áherslu á það eftir fyrsta fund sinn með Pierre Moscovici, fjármálaráðherra Frakklands, mánudaginn 21. maí í Berlín að ríkin mundu koma sér saman um stefnuna í evru-málu,

„Ég er þess fullviss að okkur muni takast að leysa úr málum,“ sagði Schäuble á blaðamannafundi eftir fundinn.

Ráðherrarnir undirbjuggu meðal annars óformlegan leiðtogafund ESB-ríkjanna 23. maí. Þeir sögðust vilja halda Grikkjum innan evru-samstarfsins.

„Við teljum báðir að Grikkir eigi heima á evru-svæðinu,“ sagði Moscovici við blaðamennina. Hann sagði að þeir væru þó ekki sammála um allt og nefndi þá evruskuldabréf.

„Þau skipta okkur mjög miklu,“ sagði Moscovici.

Þýska ríkisstjórnin hefur hvað eftir annað hafnað útgáfu evru-skuldabréfa. Með þeim á að setja allar opinberar skuldir á evru-svæðinu undir sama hatt til að skuldug ríki eigi auðveldara með að taka lán á fjármálamörkuðum. Þjóðverjar telja að slík ráðstöfun muni minnka þrýsting á stjórnvöld skuldugra ríkja og draga úr aðhaldi að ríkisrekstri þeirra. Schäuble sagði mánudaginn 21. maí að aðhaldssöm ríkisfjármálastjórn væri óhjákvæmileg til að bæta lífskjör í Evrópu.