Spánn: Neyðaraðstoð til umræðu beggja vegna Atlantshafs-bjóða út skulda­bréf í næstu viku

Spánn ætlar að selja 10 ára ríkisskuldabréf og önnur skuldabréf á mörkuðum á fimmtudag í næstu viku að því er fram kemur í Financial Times í dag. Í gær, föstudag, var ávöxtunarkrafan á spænsk skuldabréf til 10 ára um 6,5% á eftirmarkaði. Greinendur, sem FT talar við spá því að stutt verði í að Spánn leiti alþjóðlegrar aðstoðar, þrátt fyrir yfirlýsingar Mariano Rajoy, forsætisráðherra um að það verði ekki gert. Síðustu daga hafa spænskir ráðherrar átt fundi með ráðamönnum í Washington, Berlín og hjá Alþjóða gjaldeyrissjóðnum. FT segir að skilja megi ummæli ráðherranna eftir þessa fundi á þann veg, að þeir viðurkenni nú að Spánn þurfi á aðstoð að halda alla vega fyrir bankana.

FT segir að margir embættismenn og hagfræðingar hjá Evrópusambandinu telji neyðaraðstoð fyrir Spán nú óhjákvæmilega. Hins vegar geri spænsk stjórnvöld sér vonir um að geta fengið slíka aðstoð án formlegra samninga og skilmála af hálfu þríeykisins, ESB/AGS/Seðlabanka Evrópu.

Í svari við fyrirspurn í gær benti fjárlagaráðherra Spánar á, að stærstu eigendur spænskra skulda væru bankar í Þýzkaland og Frakklandi og það væri því í þeirra þágu að finna lausn á málinu.

Hugmyndir spænskra stjórnvalda um að spænskir bankar fá beint aðstoð frá neyðarsjóði ESB hafa ekki fallið í góðan jarðveg í Brussel. Eitt af því, sem embættismenn í Brussel og Berlín hafa áhyggjur af er krafa Spánverja um að þeir fái aðstoð án nokkurra skilmála. Starfsreglur ESM, hins varanlega neyðarsjóðs ESB, sem tekur til starfa í næsta mánuði leyfa ekki beina aðstoð sjóðsins við banka án milligöngu viðkomandi ríkisstjórna.