Tillögur um tímabundna landamæravörslu innan Schengen-svæðisins

Tillögur verða kynntar í ráðherraráði Schengen-samstarfsins fimmtudaginn 7. júní um að ríki geti tekið upp landamæravörslu í allt að eitt ár „vegna sérstakra aðstæðna“. Tillögurnar taka mið af kröfum Frakka og Þjóðverja sem vilja fá betri úrræði en nú eru fyrir hendi til að koma í veg fyrir komu ólöglegra innflytjenda til landa sinna.

AFP-fréttastofan segir að í skjalinu sem blaðamaður hennar hafi séð komi ekki fram hvaða skilyrði þurfi að vera fyrir hendi til að unnt verði að hefja landamæravörslu að nýju. Cecilia Malmström sem fer með innanríkismál í framkvæmdastjórn ESB bendir á að Schengen-reglur og framkvæmd þeirra miðist ekki við að hafa stjórn á innflytjendum.

Malmström minnir einnig á að hið sameiginlega bréf Þjóðverja og Frakka hafi verið skrifað og sent fyrir forsetakosningarnar í Frakklandi. Síðan hafi Frakkar skipt um forseta og þess vegna sé bréfið í raun aðeins orðin tóm. Hún hafi ekki rætt málið enn við ráðherra í nýrri stjórn Frakklands.

AFP segir að samkvæmt tillögunum geti ríki haldið uppi landamæravörslu í tvisvar sinnum sex mánuði við „sérstakar aðstæður“. Ráðherrar verða að koma sér saman um hverjar þessar „aðstæður“ eru og hvert eigi að vera hlutverk framkvæmdastjórnar ESB, hvort hún eigi síðasta orðið eða viðkomandi ríkisstjórn.

Núverandi Schengen-reglur heimila upptöku landamæravörslu ef talin er hætta á hryðjuverkum eða annarri ógn af einhverju tagi. Þeim heimildum hefur verið beitt hér á landi gegn félögum í Hell‘s Angels, samtökum Vítisengla.

Framkvæmdastjórn ESB hefur hreyft þeirri hugmynd að ríki geti einhliða lokað landamærum í fimm daga vegna þrýstings frá innflytjendum en verði að fá leyfi frá Brussel verði dagarnir fleiri.