FT og DT: Staðan á evru­svæðinu fer síversnandi

Engin samstaða um aðgerðir-deilur um eftirlit á Spáni-hækkandi ávöxtunarkrafa

Mattes

Þótt aðeins séu nokkrir dagar liðnir frá því að tilkynnt var um allt að 100 milljarða evra neyðarlán til Spánar til að endurfjármagna spænska banka virðist ástandið á evrusvæðinu fara síversnandi ef marka má fréttir Financial Times og Daily Telegraph í dag. Ávöxtunarkrafan á 10 ára spænsk ríkisskuldabréf fór í 6,8% í gær. Krafan á þýzk og brezk skuldabréf hækkaði einnig. Þá eru deilur um það hvernig haga eigi eftirliti með spænska bankakerfinu að því er fram kemur í FT. Háttsettur starfsmaður Citigroup segir FT að ástandið fari síversnandi. George Osborne, fjármálaráðherra Breta, velti því fyrir sér opinberlega í gær hvort brottför Grikkja af evrusvæðinu væri kannski það verð, sem yrði að greiða til þess að Þjóðverjar tækju við sér.

Seðlabanki Evrópu vill koma á bankabandalagi, sem þýði, að hann hafi beint eftirlit með stærstu bönkum á evrusvæðinu. Seðlabanki Frakklands styður það sjónarmið. Hið sama gerir Englandsbanki. En svo virðist sem Bundesbank, þýzki seðlabankinn sé því algerlega andvígur og telji að fyrst verði að koma á ríkisfjármálabandalagi, svo bankabandalagi.

Daily Telegraph heldur því fram, að Bundesbankinn hafi stöðvað allar hugmyndir um bankabandalag á þessu stigi málsins og segi að sameiginleg ábyrgð evruríkja á skuldbindingum hvers annars komi ekki til greina fyrr en komið hafi verið á ríkisfjármálabandalagi og pólitísku bandlagi. Angela Merkel hefur tekið undir þau sjónarmið.

DT segir að fjárfestar séu að átta sig á þvi að evruríkin hafi enn ekki komið sér saman um sameiginlega afstöðu til þess hvernig takast eigi á við evrukreppuna og það sé ástæðan fyrir því að ávöxtunarkrafan á spænsk skuldabréf hafi risið svo hátt.