G-20 fundurinn: Evrópa samþykkir að setja bankakerfi undir sameiginlegt eftirlit og taka upp sameiginlegar innistæðutryggingar

undefined

Samkvæmt fréttum frá fundi leiðtoga G-20 ríkjanna í Mexikó virðast leiðtogar Evrópuríkja, sem þar voru staddir hafa skuldbundið sig til að taka ný skref í átt til samræmds bankakerfis í Evrópu, sem lúti sameiginlegu bankaeftirliti og byggi á sameiginlegu innistæðutryggingakerfi.Þrýstingur á Evrópuríkin um að gera þetta hefur komið frá Bandaríkjunum, Alþjóða gjaldeyrissjóðnum og framkvæmdastjórn ESB. Kjarninn í þessum aðgerðum væri að rjúfa þann vítahring, sem felst í því að skuldsett ríki komi bankakerfi, sem komið er í þrot til bjargar, sem hefur svo aftur leitt til versnandi fjármálastöðu einstakra ríkja og skapað þá kreppu, sem er á evrusvæðinu að því er fram kemur á Reuters.

Í frétt Reuters kemur fram, að Þjóðverjar kunni að vera opnari fyrir slíkum aðgerðum en áður. Talsmenn einstakra ríkja á fundinum í Mexikó hafa lýst ástandinu á evrusvæðinu, sem mestu áhættu, sem heimurinn standi frammi fyrir efnahagslega. Barroso, forseti framkvæmdastjórnar ESB hefur tekið þessum athugasemdum illa og sagt að Evrópuríkin væru ekki komin til Mexikó til að hlusta á umvandanir frá öðrum. Efnahagskreppan eigi ekki rætur sínar í Evrópu. Þeirra sé að leita í Norður-Ameríku í bankakerfinu þar og er þá að vísa til Bandaríkjanna.